Serekwekîla Grûba DEM Partî ya Gulîstane Koçyigit kombîyayîşê çapemenîye yê meclîsî de rojdem erjna.

Koçyigite pîya Rayraşîyayîşê Azadîye yê Pîlî semedê azadîya Rayberê Şarê Kurdî Abdullah Ocalanî xeylêk meseleyê muhîmî erjnayî û reyna bale ante ser heta ke Abdullah Ocalan azad mebo mesleyê bînî yê welatî zî nîne çareserkerdene.

Koçyigite bale ante muhîmîya ziwanê dayîke ser û nê vatî:''Meclîs berpirsîyaro ke huqûqê ziwanê dayîke yê 20 mîlyon kurdan û şaranê bînan bipawo. Dersa vîjnayîye reyna yena muneqeşekerdene û kurdkî reyna rojdem de ya. Ma meseleya dersa vîjnayîye ser ra derheqê heqê ziwanê dayîke de qisey kenê. Ziwanê dayîke heqêkê estbîyayîşî yo. Kaînato verên o ke merdim tede yeno dinya. Coka ziwanê dayîke ra cîyamendiş vera estbîyayîşî tehdîtêk o. Eke ziwanê dayîke de perwerde bêro dayene û dezgehanê xizmetî yê fermîyan de bêro şuxulnayene no verê binpaykerdişê heqanê kulturkîyan geno û verê prosesê haştîye akeno. Semedê haştîya komelkî ganî ziwanê dayîke de perwede bêro dayene.

Tirkîya de wextê prosesê çareserî de  kurdkî sey dersa vîjnayîye mufredat de ameye cakerdene. Ez nê vajî, eslê xo de dersa vîjnayîye ya kurdkî zî xeyrê têkoşîno ke yeno rayraberdene ameye qebulkerdene. Ziwanê dayîke yê şarê kurdî nêeşkeno seba kurdan  bibo ziwano vîjnaye. Têna ziwanêko xerîb çew eşekeno sey ziwanê vîjnayeyî bimuso. Ma eşkenê îngîlîzkî bivijnê, almankî ya zî ziwanê ke bînî la ma nêeşkenê ziwanê xo yê dayîke sey ziwanê vîjnayeyî bimusê. Çunke xora o ziwanê yê dayîke yo. No binpaykerdişê heqan o. Coka ma reyna tîya ra vanê, ma sey DEM Partî wazenê wa kurdkî bibo ziwanê perwerdeyî û dezgehanê xizmetî yê fermîyan de bêro şuxulnayene.

Hetê bînî ra tay hetê ke bi îtîfaqê AKPyî kewtî meclîs vanê, 'nê welatî de meseleya kurdkî çîn a2û 'meseleya ziwanê dayîke çîn a.' Ma tîya ra veng danê, wa bêro meclîs de yew-di qalan kurdkî bikero. Ma bivînê nê welatî de kurdkî serbest a ya nê. Ma na mesele hewaleyê wîjdanê şarê kurdî  rayapêroyîye ya Tirkîya kenê.''