Wekîlê DEM Partî Newroze Uysal Aslan û Dîlane Kunt Ayan Komîsyonê Cigêrayîşê Heqanê Merdiman ê Meclîsî rê muracat kerd.

Muracat de ame vîrvistene ke wekîlanê DEM Partî 16ê teşrîna peyêne de muracatê komîsyonî kerdbi ke Abdullah Ocalan, Hamîlî Yildirim, Omer Hayrî Konar û Veysî Aktaş de pêvînayîş bêro kerdene ke Zîndanê Îmrali de binê tecrîdî de yê. 

Muracat de wina ame vatene: ''Komîsyonî ancî sey verî teyna îzehetê Wezîrîye ma rê sey cewabî şawit û derheqê muracatê ma de ercnayîşêko qîm nêkerd. Coka ma sey endamanê komîsyonî yê DEM Partî wazenê ke wa muracatê ma newe ra bêro ercnayene, selahîyetdarê wezîrîye komîsyon de bêrê goşdarîkerdene û Zîndanê Îmraliyî de herinda ci de zîyaret û cigêrayîş bêrê kerdene.''

Eşkerayîye de wekîlan da zanayene ke zîndanan de heqê tepişteyan bi giranî yenê binpaykerdene la vera ney komîsyonê MEclîsî erk û mesuldarîyanê xo nêano ca.

Wekîlan dîyar kerd ke Rayberê Şarê Kurdî Abdullah Ocalanî ra 38 mengî yo xeberêke nêna girewtene la wezîrîye cewabê xo yê serê muracatê partîye de teyna serra 2023yî ser o zîndan ercnayo û tecrîd red kerdo.