Rêxistina DEM Partî ya Îstanbulî seba destekê 'Rayraşîyayîşê Azadîye yê Pîlî' 25ê sibate de qezaya Esenyurtî ya Îstanbulî de do 'Mîtîngê Demokrasîyî û Azadîye' bikera. 

Derheqê mîtîngî de bînaya Rêxistina DEM Partî ya Îstanbulî de eşkerayîyêke ameye dayene. Xeylêk temsîlkarê rêxistinanê komelê sivîlî tewrê eşkerayîye bîyî. 

Hemserekê DEM Partî ya Îstanbulî Gonca Yangozî eşkerayîye wende û pare kerd ke serkêşîya modernîteya kapîtalîste de xîret yeno kerdene ke dinyaya newîye  dîzayn biba. Yangoze îfade kerd ke komelê Tirkîya û Kurdîstanî zî bi destê AKP-MHPyî goreyê nê dîzaynî yenê xerakerdene. 

Yangoze vat: ''Îqtîdarê AKP-MHPyî seba ke komelî esîr bikero tecrîdêkê bêexlaqî ano ca. Seke zanîyeno mabênê 1-15ê sibate de di baskan ra Kurdîstan de 'Rayraşîyayîşê Azadîye yo Pîl' amebi kerdene. Nê rayraşîyayîşî armanc kerd ke tecrîd wedarîyo û meseleya kurdan bêra çareserkerdene. Raywanê Azadîye serî ra heta binî pêro Kurdîstanî ra gêrayî raştîye û ancî ame dîyene ke bi têkoşînê komelkîyî ma eşkenê faşîzmî çin bikerê.''

Yangoze ard ziwan ke sey pawitoxanê Rayîrê Hîrêyînî ê do tim bigêrê raştîye û na çarçewe de xebatanê weçînayîşanê herêmîyan bivurnê têkoşînêkê komelkîyî. Yangoze pare kerd ke DEM Partî seba destekê Rayraşîyayîşê Azadîye yê Pîlî 25ê sibate de Mîtîngê Demokrasî û Azadîye bikerê. Gonca Yangoz venga pêro kesan da ke seba cuyêka newîye bi xurtî tewrê nê mîtîngî bibê.