Sakarya de tay karkerê serrewextî yê kurdî maruzê hêrişê nîjadperestî bîyî. Şîrîn Demîro ke merdimê nê karkeran o derheqê mesele de ANFyî rê qisey kerd.

Demîr îfade kerd ke 4ê êlule de wexto ke karkeran dest pê xabet kerd nîjadperestan pê înan heqaret kerd. Demîrî vat: ''Dima ke merdimanê ma xebate war verdaye nîjadperestan hêrişê înan kerd. Lapat eşt birakênaya mi Şîlane Demîr. Bi zorî merdimê ma uca ra vejîyayî. Hol o ke wesayîtêk ameyêne Mêrdîn, cade niştê wesayît û ameyî. Eke uca de bimenêne çîyo xirab ameyêne sereyê înan ser.''

Demîrî vera eşkerayîya walîyê Sakarya nêrazîbîyayîşê xo mojna û vat: ''Vanê serebût 22ê tebaxe de Kocaelî de bi, zûr o. Serebût 4ê êlule de qewimîya. Ê hêriş mîyan kenê. Eke nê nîjadperestan tay kesan ra cesaret nêgirewtêne wina nêkerdêne. Xîret kenê ke merdimî welatê xo de bienciqnê. Asayîş paştî dano înan. Keso ke Êlih de tecawuzê kênaya ciwane kerde, se bî ci? Bi serran o ke hêrişê winasênî vera ma yenê kerdene. La ê nê hêrişan nimnenê. Xîret kenê hêrişê Sakarya zî binimnê.''