Hemvervatoxa Kongreya Demokratîke ya Şaran (HDK) Esengule Demîr derheqê tewirê îqtîdar û muxalefetî yê serê meseleyan de ANFyî rê qisey kerd.

Esengule Demîr vist vîrî ke wextêkê dergî ra nata Rojawan binê ablûqa de yo, têkilîya ci ya bi herêmanê bînan yena birnayene û vat: ''Tirkîya asta mîyanneteweyîye de xîret kena ke Rojawan teng bikera û bi hêrişan kurdan tira veja. Ma zanenê ke seba ke herême bikewa binê kontrolê xi hemleyê taybetî yê polîtîkî est ê. Hêrişê Tirkîya yê vera Rojawanî bi destûrê hêzanê mîyanneteweyîyan yenê kerdene. Seke Wezîrê Karanê Teberî Hakan Fîdanî bi zelalî vatbi ke nê hêrişan de binawanî û çimeyê enerjî yê herême yenê hedefkerdene.''

Demîre da zanayene ke sey HDKyî meseleya Filîstînî de tewirê înan eşkera yo û ê paştî danê dewaya Filîstînî. Demîre ard ziwan ke Tirkîya de vera kişîyayîşê sivîlan ê Rojawanî nêrazîbîyayîş nêno mojnayene la seba Filîstînî no nêrazîbîyayîş est o. Esengule vat: ''Eke cayêk de sivîlî kişîyenê o çax şima ganî vera ci tewirê xo bimojnê. Rojawan de depoyê genimî, nêweşxaneyî, dibistanî dîyenê bombayan ver û doman, cinî û sivîlî kişîyenê. 

Meclîs de tezkereya Sûrîye û Iraqî yena qebulkerdene la vera hêrişanê Îsraîlî yê serê Filîstînî tewir yeno mojnayene. Partîyê muxalefetî yê Tirkîya paştî danê hêrişanê Rojawanî la Îsraîlî rexne kenê. Îqtîdar û muxalefetê Tirkîya bi hawayêkê dirîyî sîyaset kenê. Hêrişanê vera Rojawanî de rolê muxalefetî zî est o. Muxalefet bi nê tewirê xo mojneno ke o mesuldaranê sîyasetê şerî ra yo.''