Derheqê Îdrîs Baluken o ke Zîndanê Tîpê F’yî yê Sîncanî de yeno girewtene de qerarê bi zor ardişê odaya SEGBÎS’î ame dayene. Mahkeme verê cû zî derheqê ci de qerarêko winasî dabi û Balukenî o wext zî bi rayîrê SEGBÎS’î tewrbîyayîşê roniştişî red kerdibi.

Avûkata Balukenî Reyhan Yalçındag Baydemîre, ard vîrî ke derheqê muwekilê aye de dewayê ke heta nika ameyê akerdene, wexto ke muwekîlê aye hetkarê serekê Grûba HDP’yî bîyo, rîyê qiseykerdiş û eşkerayîyê ke dayê rayapêroyî ra ameyî akerdene û vat, rixmê naye, azadîya îfadeyî û fikirîyayîşî muwekîlê aye amey, çinkerdene û derheqê ci de xeylî dewayî ameyî akerdene.

Mumkin nîyo ke ma nê qerarî qebûl bikerê

Avûkate Yalçindage reaksîyon da qerarê mahkeme yê ‘bi zor ardişê odaya SEGBÎS’î  û vat, mumkun nîyo ke ê nê qerarê mehkeme qebul bikerê û vat, “No qerar huqûqî nîyo, çunke bi zor ardişê odaya SEGBÎS’î, yeno manaya kesêkî bi xebitnayîşî zorê fîzîkî ardişê oda yo. Çîyêko winasî hewca nêkeno. Verê cû zî parlamenteranê bînan rê zî wina kerd. Fîgen Yuksekdage û Selma Irmake rê zî wina kerdibi. Ma huqûqnasan no kerdiş reya tewr verêne parlamenteranê HDP’yî reyde şinasna. Bi zor ardiş, kesê ke hepisxaneyan de nîyê rê yeno kerdene. Oxro ke ma tîya de qalê keso ke xora mîyanê çar desan de yo kenê. No qeraro ke ameyo dayene hem hetê usulî ra hem hetê qanûnê bingeyênî ra huqûqî nîyo.”