Wextê peyênî de Dêrsim de mergê sivîlî û waqayê şîdetê zêdîyenê û bale ancenê. Wekîlê HDPyî yê Dêrsimî Alîcan Onluyî derheqê mesele de eşkerayîya nuştekîye daye.

Onluyî eşkerayîye de îfade kerd ke şîdet, binpaykerdişê heqanê merdiman, îşkence û bêusûlîye Kurdîstanî ra vila benê Tirkîya. Onluyî vat: ''Nê hêrişê sîstematîkî yenê kerdene metodêkê îdareyî û pê polîtîkaya bêcezaverdşî pêro waran rê yenê vilakerdene.''

Onluyî vat: ''Dêrsim bîyo o ca ke dewlete tede polîtîkayanê taybetan ana ca û vurnena merkezê caardişanê pîlotan. Qirkerdişê Murat Yildizî, şewatê daristanan û çekdayîşê sereyê cinîyêke îsbatê nê caardişan ê.''

Onluyî ard ziwan ke Tirkîya de çeke nêdîyena sereyê lîderanê mafya, tecawuzkeran, îşkencekeran, cergan ro, vera înan tehqîqat nêno akerdene la Dêrsim de cinîyê ke vanê 'Gulîstane Doku kamca de ya', kesê ke Seyîd Rizayî yad kenê û vera talan û asîmîlasyonî xo ver danê maruzê tehqîqatî benê.

Onluyî vat: ''Ganî şar, dezgeh, temsîlkarê Dêrsimî vera nê hêrişan bibê yew û nasname, kultur, ziwan û bawerîya Dêrsimî vera nê hêrişan bipawê. Eşkerayîyê Walîtîya Dêrsimî nê hêrişan mîyan kenê, heta meşrû kenê. Hema zî serebûtanê tacîzî yê Zanîngehê Munzurî, cerganê fuhuş û kundoxan, sûcanê hêzanê asayîşî ser o tehqîqatêk nê dîya destpêkerdene. Gulîstane Doku qestî ra nêgêrîyena. Nê pêro mojnenê ke Dêrsim de provakasyonî do dewam bikerê. 

Merkezê Dêrsimî de çi gureyê çawişan ê pisporan esto? Senî înan çeke darte sereyê cinîyêke? Eke şar vera ney nêvejîyayêne do se bibîyêne? Pê nê provakasyonan zemînê mergê sivîlî yenê amadekerdene? Selahîyetdarî cewabê nê persan nêdanê.''