Partîya Demokrasîyî û Têdûştîye ya Şaran ( (DEM Parti) çarçewa xebatanê weçînayîşê 31ê adare de qezaya Qisle de buroyê weçînayîşî û merkezê Dêrsimî de buroyê weçînayîşî yê cinîyan akerdî.

Weîla DEM Partî ya Dêrsimî Aytene Kordu pabesteyê îtîfaqî tewrê akerdişan bîyî. Akerdişî bi def û zurna û govendan bi coşî ameyî kerdene.

 Korduya ke akerdişê Qisle de qisey kerd rojdem erjna û vat rixmê heme zextan, tecrîd û înkarî ê sareberz têkoşînê xo domnenê. Bado ke namzedanê Şaredarîya Qisle Songule Sarigul û Şukru Duztaşî zî qisey kerd buro hetê cinîyan ra ame akerdene. Dima ra loqmayî ameyî vilakerdene. Prorgaram bi zîyaretkerdişê esnafan dewam kerd.

Dima ra Gazîk de buroyê weçînayîşî yê cinîyan ame akerdene. Bi seyan cinîyî tewrê akerdişî bîyî. Akerdiş de aqibetê Gulîstane Doku ame persayene ke Dêrsim de ameyî vînîkerdene û hema zî nêameya vînayene. Akerdişê buroyî ke bi govnede ciwanan û cinîyan ame kerdene de Dayîkanê Haştîye vernî de cayê xo girewt.

Namzeda Hemşaredarîya Dêrsimî Birsene Orhana ke akerdiş de qisey kerd, bale ante problemanê sey erdlerz û barkerdişî yê Dêrsimî ser û nê vatî: ''Barkerdiş problemo newe nîyo, bi serran o ke ma bi polîtîkayanê bakerdişî rî bi rî yê. Ewro mîyanê ci de problemê ekonomîkî bibê zî barkerdiş netîceya polîtîkaya şerê taybetî ya. Ma hinî nêwazenê teberê welatî ra tabûtan bikirişê, ma wazenê înan weş û war pêşwazî bikerê. Dêrsim de cinîyêka ciwanê vînî bîyî ke her hetê bajarî bi kamerayan grewte yo. Ma do tim aqibetê Gulîstane Doku bipersê.''

Birsene Orhana wina dewam kerd'' Ma do destkewteyanê cinîyan bipawê û semedê cinîyan waranê neweyan abikerê. Ma do semedê cinîyan ê astengdaran îmkanan biafirnê. Ma do meclîsanê cinîyan û Alo Xeta Şîdetî ronê. Ma do nê pêrune pîya bi pabesteyanê xo û komîsyonanê xo  bikerê, ma do pêro pîya bigerê rayîrê çareserîye.''

Orahane vat:'' Dêrsim de ma bi kulturê elewîyan ciwîyenê. Ma vînenê ke sîstem senî kewno merkezanê bawerîya ma û nê cayan senî açarneno waranê rantî. Merdimî werdê xeyrî restorantan de danê. Ma do Gazîk de Cemxane abikerê û nê polîtîkayanê asîmîlasyonî vindarnê.''

Badê akerdişê buroyê namzedanê Dêrsimî û pabesteyanê îtîfaqê Dêrsîmî pîya esnafî zîyaret kerdî û problemê şarî goştarî kerdî.