Namzedanê Şaredarîya Dêrsimî yê DEM Partî Bîrsene Orhan û Cevdet Konakî Ajansê Mezopotamya rê qalê plan û projeyanê xo kerd. 

Cevdet Konak 1961 de dewa Axzunîkî ya qezaya Xozatî ya Dêrsimî de dadîya xo ra bîyo. Ey di reyî Xozat de şaredarîye kerde.  

Bîrsene Orhan qezaya Pêrtagî de dadîya xo ra bîya. A 15 serrî yo mamostatîye kena. Bîrsene Orhan hetê bînî ra edîtorîya weşanxaneyêkî zî kena. A 2013 de bîye Hemsereka HDPyî ya Pêrtagî û dima zî îdarekarîya DBPyî ya Amedî kerde. 

Namzede Bîrsene Orhan îfade kerd ke DEM Partî Dêrsim de bi tewrbîyayîşê şarî meseleyan do çareser bikera û vat: ''Pratîkê ma werte de yê. Hêzê ma est o ke ma pêro meseleyanê şaristanî çareser bikerê. Dêrsim de kuçeyan de madeyanê narkotîkî roşîyenê, ajanîye merdiman rê yena ferzkerdene. Sîstem wazeno profîlêkî awan bikero. Vera nê manîpulasyonê 'Tuncelî' ma do kodanê Dêrsimî yê verînan bîyarê. Ma do bi kultur û bawerîya Dêrsimî heqê pêro meseleyan ra bêrê.

Heyf ke şaristan de ciwanê ma krîzê ekonomîkî ra koçê Ewropa kenê.Verê cû zî merdim û ciwananê ma meseleyanê sîyasîyan ra koçê teberî kerdbi. Ma hinî nêwazenê ke merdimî bi tabutan abigêrê erdê xo.  Ma wazenê îradeyê xo yê xespkerdeyî apey bigêrê. Ewro vera destkewteyanê elewî û kurdan hêrişî est ê. Waranê kulturelan de ma do sey şaredarîye pêro mesuldarîyanê xo bîyarê ca. Ma do keyeyanê perwerdeyî abikerê û giranîye bidê xebatanê ziwanî ser. Hetê bînî ra şaredarîya cinîyan xeta ma ya mor a. Naye ra ma felsefeya Jin, Jiyan, Azadî sey felatê xoza û merdimatîye vînenê. Dêrsim şaristanê cinîyan o û ma do sîstemê cinîyan şaristanê xo de bi hawayêkê tewr rindî awan bikerê.'' 

Cevdet Konakî cografyaya Dêrsimî bi Terteleyê Dêrsimî pênase kerd û vat: ''1938 de seba ke ziwan, nasname, tarîx û vîrê ci bêrê çinkerdene vera nê şaristanî qirkerdiş ame kerdene û 30 hezar merdimî ameyî qetilkerdene. La şarê ma rixmê tedayan zî paştdayîşê xo pêt kerd û tarîxê xo pawit. 1984 de Dêrsimî ancî serewedarit. 1994 de ancî merdimê ma ameyî surgunkerdene, erzîyayî zîndanan. Ma nê dejî zaf antî. Ma soz dabi ke wayîrê erd, nasname, bawerî, ziwan û kulturê Dêrsimî vejîyê. Rayberê ma Seyîd Riza û embazê ci yê, tarîxê Elîşêr û Zerîfa yê.  

 Dêrsim de planê ma yo yewin bihêzkerdişê vîr, ziwan, kultur û tarîxê şaristanî yo. Ma do ziwanê xo yê dayîke aver berê; çunke eke şar ziwanê xo ra abirîyo tarîxê xo ra  zî abirîyeno. Ma do weçînayîşanê 31ê adare de ser bikewê. Şarê Dêrsimî do qiseyê xo vajo. Ma do şarê xo reyde verê texrîbatan bigêrê, rayîr nêdê madenan û HESan.  Ma do nêverdê ke daristanê ma bêrê vêşnayene. A raşte nê texrîbatê xoza seba ke şarê ma koç bikero yenê kerdene.''

Namzedanê Dêrsimî peynîya qiseykerdişê xo de no mesaj da: ''Dêrsim DEM o, DEM Dêrsim o. Seba ke ma Dêrsimî newe ra awan bikerê pîya bixebitê. Ma pîya ser bikewê!''