Rêxistina HDPyî ya Dêrsimî bi slogana 'Seba cuyêka rêxistinkerda pêro pîya” kongreya xo ya çarine kerde.  Heyata Konferansî ya Şaredarî ke kongre tede ameye kerdene bîye pir cayê roniştişî nêmend.

Kongre bi rêzgirewtişî dest pêkerd û dima ra dîwan nîya ro. Qiseykerdişê diwanî de şexsê sîyasemedaran Ergîn Dogu, Mehmet Alî Bul û Nurhayate Altune de sîyasetmedaranê tepişteyan rê selam  ameyî şawitene. Hemsereka Rêxitine ya Dêrsimî Nurşate Yeşîle bale ante hêrişê vera xoza, nasname, kultur û bawerîya Dêrsimî ser û vat ê do têkoşînê Seyîd Rizayan, Zarîfe û Sarayan bidê domnayene. Dima zî derheqê qeyûmê şaredarîye, çalakîyanê keyeyê Gulîstane Doku û hêrişê vera xoza de sînevîzyon ame ramojnayene. Wekîlê Dêrsimî Alîcan Onluyî kirmanckî qisey kerd. Gama ke Onluyî bale ante tecrîdê serê Rayberê Şarê Kurdî Abdullah Ocalanî ser heyate ra sloganê 'Bijî Serok Apo'yî bîyî berz.

Dima Hemserekê Pêroyî yê HDPyî Mîthat Sancarî qisey kerd. Sancarî seba ke o rojanê Xizirî de Dêrsim de yo keyfweşîya ard ziwan û vat: ''Zextê ke tîya benê modelê sîstemê Tirkîya yê. Dêrsim de vera nasname, xoza û kede hêrişî dewam kenê. Helqê zextanê Dêrsimî kahan ê. Her hêrişo ke vera vera Munzurî beno vera nasanmeyê Dêrsimî yo. Tradîsyonê azadîye û seyyewbînîye yê şaran û bawerîyan ra tersenê. Ma sey HDPyî nê tradîsyonî danê domnayene.

Îqtîdar şar tarîtîye rê mehkum kerd. Vera zemê elekrîkî şar no serd sipir de kuçeyan de yo. Têkoşîno ke semedê azadîya nasname û bawerîye yeno dayene têkoşînê karî ra nêeşkeno bêro raqilnayene. Ganî nê têkoşînî pîya bêrê reyraberdene. Kam ke berpirsîyarîye ra birewmo do hesab bido neslena ameyoxî. Ganî heme hetê komelî, maxdûr, û bindestî miheqeq berê têhet. Beno ke ma sey yewbînan mefikîrîye la ganî ma warê têkoşînî de bibê yew pîya têbigêrê.

Cigêrayîşê edaletî yê Keyeyê Şenyaşaran û keyeyê Gulîstane Doku bêedaletîya welatî fînena çiman ver. Vengdayîşê heme mazlûman yê semedê edaletî vengdayîşê ma yo zî. No îqtîdar pê polîtkayanê şerî wazeno payra bimano. Îqtîdar wazeno şaran û bawerîyan yewbînan ra cêser bifîno ke têkoşînê vera ci nêro pîlkerdene. Îtîfaqê demokrasîyo ke HDP wazenê çend şino pîlêr beno. Çare ma yê.  Bano ke welat dengayî de yo la ma zanê ke Xizir cayê înan de yo ke tengayî ancenê.''

Bado ke raporê falîyetî ame wendene Ferhat Yildiz û Gulsume Ozdemîr sey hemserekanê neweyan ê Dêrsimî ameyî vîjnayene. Hunermend Hasan Ali zî bi deyîranê xo yê kirmanckîyan tewrê kongre bi.