Hemserekê Pêroyî yê HDPyî Mîthat Sancar Dêrsim de Otêla Grand Şarogluyî de temsîlkaranê partîyan û rêxistinanê komelê sivîlî de pêvînayîşêk kerd. Serekê Baroyê Dêrsimî Kenan Çetîn, hetkarê Şaredarê Dêrsimî Canane Ay û Umît Kaya, Hemşaredarê Şaredarîya Pêrî Orhan Çelebîyo ke herinda ci de qeyûm amebi tayînkerdene, Îdarekarê Komeleyanê Elewîyan ê Demokratîkan (DAD), Komeleya Kulturî ya Pîr Sultan Abdalî (PSAKD), ÎHD, CHP, ESP, Partîzan, EMEP, SMF û sendîkayê TMMOB û KESKî tewrê pêvînayîşî bîyî.

Wekîlê HDPyî yê Dêrsimî Alîcan Onlu, Serekê Pêroyî yê Konfederasyonê Yewîya Elewîyan ê Ewropa û wekîlo verên Turgut Oker, Hemserekê HDPyî yê Dêrsimî Nurşate Yaşîl û Îbrahîm Kasun û Endamê Meclîsê Partîye Nesîmî Aday zî hetê Sancarî de bîyî. 

Sancarî dima qisey kerd û vat: ''Hêrişê sîstematîkî yê vera Dêrsimî laboratuwarê hişmendîya ke wazîyena Dêrsim de bêra awankerdene. Eke ma bieşkê çarçewa demokrasî, edalet, têdûştîye û azadîye de têkoşîno hempar bêro kerdene ma eşkenê verê nê hêrişan bigêrê.  Dêrsim xeylêk hetan ra gêrîyeno binê ablûqa û hêrişan de têrî yo. Nê hêrişî seba pêro waranê Tirkîya derbazdar ê. Coka ma bi hişmendîyêka îqtîdarî ya winasênan de têrî yê ke bawerî, xoza û şaran talan kenê.  

Metodê ma, armancê ma eşkera yê. Wezîfeyê neweyî pabeyê ma yê. Seba ney zî ganî ma dormeyê têkoşînêkê hemparî de bêrê têhet û pêro waranê cuye debikerê. Dêrsim rixmê pêro zor û zehmetîyan zî do mekewo dafike. Dêrsim do bikero ke pêro cîyatîyî ver bi armancê hemparî şorê.''