Hemserekê Pêroyî yê HDPyî Mîthat Sancar Dêrsim zîyaret kerd. Programê di rojan de roja verêne Sancarî rêxistina partîye zîyaret kerd. Wekîlê partîye yo verên Turgut Oker û Wekîl Alîcan Onlu zî tewrê zîyaretê Sancarî bîyî.

Sancar hetê grûbêka sixletîye ya partîye ra ame verwazîkerdene û dima ra şi banê partîye û hemserekanê bajarî Nurşate Yeşîl û Îbrahîm Kasunî ra derheqê xebatanê înan dir zanayîş girewt. Patîyîjan ard ziwan ke rîyê krîzê ekonomî ra şar zaf tengayî anceno û vat: ''Coka herême de hûmara xelisyayîşî bîya kême û şar zaf barkeno.  Reyna seba ke operasyonê leşkerî yenê kerdene û wareyî yenê qedexekerdene heywankarîye nîna kerdene. Coka dewî benê veng. Hetê bînî ra ciwanî welat de ameyoxê xo nêvînenî coka verê xo danê welatanê teberê welatî.''

Qefleyêkê wendekaranê unîversîte zî banê partîye de Sancarî reyde ameyî têhet. Dima ra Sancar pîya bi partîyîjan vejîya teber û esanfî zîyaret kerdî. Dêrsimijan zaf eleqa mojna Sancarî. Sancarî rotoxanê gêrokan û ramitoxanê taksî û minibusan reyde qisey kerd. Reyna gama ke Sancar kuçeyanê Dêrsimî ra gêrayêne raştê  Apê Hidirî yo ke namdaranê Dêrsimî ra yo ame û tede qisey kerd.

Partîyîjan zî semedê kongraya rêxistina bajarî ya ke do siba bêro kerdene vilawekî vila kerdî û sloganê 'HDP şar o, şar tîya de yo'eştî. Zîyaretê esnafan ê Sancarî Meydanê Seyîd Rizayî de qedîya.  Sancarî tîya pîya bi partîyîjan verê peykerî fotografêk ant. Sancar do saetanê vera şanî de temsîlkaranê rêxitinanê komelê sîvîlî û partîyanê sîyasîyan reyde bêro têhet.