Rêxistinanê huqûqî Îstanbul, Amed, Adana û Anqara de çalakîyî kerdî û operasyonanê qirkerdişê sîyasîyî de destbendkerdişê avûkatan protesto kerd.

Anqara

Şubeyê Anqara yê Komeleya Seba Azadîye Huqûqî (OHD), Komeleya Huqûqnasan ê Modernan (ÇHD), Şubeyê Anqara yê Komeleya Heqanê Merdiman (ÎHD), Seba Huqûqê Komelkî û Demokrasî Avûkatan operasyonê vera avûkatan protesto kerd. Avûkatî verê Edlîyeyê Anqara de ameyî pêser û pankarta ''Ma pawitiş pawenê'' akerde. Sereka OHDyî ya Anqara Şevîn Kaya wexto ke eşkerayîya hempare kerdêne polîsan hêrişê çalakîye kerd û avûkatî derb kerdî.Eşkerayîye de ame vatene: ''Aseno ke hukm bibê emrê AKP-MHPyî de yo. Kerdişê avûkatan ê azadan û şorişgeran yenê krîmînalîzekerdene.''

Îstanbul

OHD, ÇHD,  Seba Huqûqê Komelkî û Demokrasî Avûkatî, Grûba Avûkatan ê Modernan, Grûba Avûkatan ê Azadîgîran, Grûba Avûkatan ê Azadîgeran ê Demokratan, Avûkatê Huqûqê Sosyalî verê Edlîyeyê Çaglayanî yê Îstanbulî de kom bîyî. Avûkatan pankartê bi nuşteyê ''Pawitiş nêno bêvengkerdene, Avûkatê şorişgêrî rûmetê ma yê, Tedayî ma hîş nêkenê'' akerdî û bi sloganan heta meydanî rayîrî ra şîyî. Hemsereka OHDyî ya Îstanbulî Arzu Kayaoglu eşkerayîya hempare wende û îfade kerd ke nê destbendkerdişî bêusulîya hukmê îqtîdarî mojnenê.

Adana

Avûkatê ÎHDyî, ÇHDyî yê Adana şubeyê ÎHDyî de ameyî pêser. Endamê HDPyî, AYKAY-DERî, TUHAY-DERî, Egitim-Senî û xeylêk kesî tewrê çalakîye bîyî.
Avûkate Sevîle Araci Bek nameyê avûkatan eşkerayîye wende û vat: ''Huqûqê ceza yê dişmenî yeno caardene. Hêrişî yan zî tedayî do nêeşkê asteng bikerê ke ma avûkatîya muxalîfîya komelî bikerê.''