Wekîla HDPyî ya Amedî Semra Guzela ke aşma adere de meclîsê tirkî de destnêpadayîşê ci amebi wedaritene vizêr Îstanbul de ameye destbendkerdene.

Guzele ewro sewqê Edlîyeya Îstanbulî ya Çaglayanî bîye. Guzele verî semedê kontrolê weşîye ameye berdene nêweşxane. Di polîsanê cinîyan gama ke Guzele berdene destê ci peykî kelemçe kerdî, lezabez berd û kerd ke sareyê ci bîyarê war. Guzele seba ke sereyê xo çewt nêkero têkoşîn kerd. Wexto ke Guzele nêweşxane ra ameye teber zî polîsan eynî çî kerd.

Hetkarê Hemserekanê Pêroyî yê HDPyî Tayîp Temelî hesabê xo yê medyaya sanale ra nêrazîbîyayîş mojna û vat: “Embaza ma Guzele hema wekîl a. Derdê înan oyo ke îradeyê ma bişiknê.  Kelemçeyanê peykîyan kenê pa, gijikê ci ancenê û kenê ke sereyê ci bîyarê war. La şima do ser nêkewê. "