Wezîrîya Karanê Zereyî ya Tirkîya şaredarîyanê HDPyî yê Sêrt û qezayanê ci yê Hawêl û Misirc û bajarekê Altinova û şaredarîya Îdirî de qeyûm ca kerd. Îqtîdarê faşîstî prosesê janî de zî mabên nêda qeyûman hemşeradarê ke karî girewtî destbend kerdî. Vera nayê Kurdîstan û Tirkîya şar vejîya kuçeyan û vat hînî  beso.

Îdir de şar seba ke îradayê înan ameyo binpaykerdene vejîya kuçeyan vera na nêheqîye nêrazîbîyayîşê xo ramot. Polîsan bi bombayanê gazî hêriş kerd.

Sêrtî de bi tewrbîyayîşê rayberanê HDPyî yê bajarî çalakîyêke ameye viraştene. Çalakîye bêhuqûqîya hukmatî ameye şermezar kerdene û vatene ke ê wayîr hemşaredaranê xo vejîyenê û qeyûmî nas nêkenê.

Amed de zî merkez û qezayanê  ci de bi eşkerayîyanê çapamenîye binpaykerdişê îradeyê şarî ame şermezarkerdene. Eşkerayîya de bale ameye antene dişmenîya dewlete yê vera kurdan ser û ame vatene ke hêrişê goristan, meyîtan û şarî kenê. Binê naye de amadekarîya qirkerdişêk esta, ma do vera naye çok nêdê.  Rixmê heme hêrişan înan de têkoşînî gird bikerê.

Reyna Şirnex, Merdîn, Meletî, Riha, Ankara, Îstanbul, Adana, Mersîn, Hatay, Antalya, Manîsa, Mugla, Aydin û xeylêk bajaranê bînan ê Kurdîstan û Tirkîya de çalakîyî ameyî kerdene û ame vatene ke Kurdsîtan de zulm, xesp, hêriş, îşxal esto û ame vengdayene ke wa vera nê hêrişan xoverdayîş bêro girdkerdene.