Qezaya Meramî ya Konya de 30ê temuza 2021î de keyeyê Dedeogullari yo kurd raştê qirkerdişî ame. Kiştox Mehmet Altunî keyeyê Dedeogullariyî ra 7 kesî qetil kerdî. Kiştox Altun û pa 9 şikdaranê ke bêtepiştişî yenê muhakemekerdene ewro roniştişê dewaya înan o çarin Mehkemeya Cezaya Giran a 4. ya Konya de ame kerdene.

Pîya bi avûkatanê wird hetan xeylêk avûkatê OHDyî, îdarekarê HDPyî yê Konya û merdimê Dedeogullariyan tewrê roniştişî bîyî. Şikdarê ke bêtepiştişî yenê muahkemekerdene bêmazeretî tewrê roniştişî nêbîyî. Kiştox Mehmet Altun û Velî Keleş û Lutfî Keleş êyê ke 12ê gulane 2021î hêrişê Dedeolgullariyan kerdbi, zîndanî ra bi sîstemê SEGBÎSî tewrê roniştişî bîyî.

Avûkatê Dedeogullariyan Atila Kartî ard ziwan ke qiseykerdişê telofînî ra yeno famkerdene ke keyeyê Altunî qirkerdişî ra hayîdar o û  paştî dano kiştoxî. Avûkat Kartî vat Keyeyê kiştoxî rê herkarîya pereyî yena kerdene û waşt ke wa hesabê cinîya kiştoxî Zehra Altun berê kontrolkerdene. Atîla Kartî vat qiseykerdişê telefonî de yeno tesbîtkerdene ke delîlê sexteyî yenê amadekerdene.

Kartî vist vîrî ke pêvînayîşê 45 deqayan ê kiştoxî yo ke 2ê tebaxa 2012î de Mudirîya Asayîşî de ame kerdene hema vînîbîyaye yo û vat: ''No qiseykerdiş dosya de çîn o. No yeno no mana ke mabênê polîsan û kiştoxî de yew bazarîye est a. Reyna dîmenê waxtê qirkerdişî zî dosya de çîn ê. Ganî qiseykerdişê telefonî û dîmenî cade dosya de berê cakerdene.''

Dima ra avûkatî derheqê qeydanê vengî ke dosya de ca genê Altunî rê persî persayî. Avûkat Abdurrahman Karabulut vat: ''Ti îfadeyê xo de vanê 'polîsan hetkatîya mi kerde' kam/e senî to rê hetkarî kerde û ti vanê 'zafê polîsan vat înan merg heq kerdo' nê polîsî kam ê? Kiştoxî vat:  ''Nîno vîrê mi ke mi çîyêko winayên vato.'' Karabulut badê persan vat:  ''Eşkera yo ke dozgerîye û polîsî kiştoxî pawenê. Ni cipersayîş bêhet nîyo. Cipersayîş semedê pawitişê kiştoxan beno. Coka dosyayê qikerdiş û hêrişî bîyî yew.''

Heyetê mehkeme ronişo bîn 20ê êlule rê peyde eşt.