17ê hezîrana 2021î de hêrişê vera bînaya Rêxistina HDPyî ya Îzmîrî de Denîze Poyraz amebî qetilkerdene. Roniştişo 6. yê dewaya ke tede kiştox Onur Gencer yeno muhakemekerdene, Mehkemeya Cezaya Girane ya Îzmîrî de yeno kerdene. Wekîlê HDPyî û partîyanê bînan, rêxistinê cinîyan û komelê sivîlî, baro û avûkatî roniştişî teqîb kenê.

Roniştişê dewaya Denîze Poyraz ra verî eşkerayîye ameye dayene. Verê edlîye de nê mesajî ameyî dayene:

Wekîla HDPyî ya Îzmîrî Serpîle Kemalbay: ''Ma pê şikî kenê ke na dewa de edalet do nêro caardene. Pê qirkerdişê Denîze ame waştene ke Tirkîya de kaos vejîyo. Şexsê HDPyî de ame waştene ke vera hêzanê demokrasî hêrişî dest pêbikerê. Kesê ke peyê kiştox Onur Gencerî de yê mesuldarê nê hêrişan ê. La ma do qetî vera hêrişan apey gamêke nêerzê. Nê dozger, dadger û mekanîzmaya hukmî yê ke îqtîdarî ra ferman gênê, do peynî de bêrê muhakemekerdene.''

Sezaî Temellîyî vat: ''Yeno xîretkerdene ke serê nê cînayetî bêro girewtene. Se serrî yo vera cografyaya kurdan dişmenîye yena kerdene û na hişmendîya ke waşt serê nê qetilkerdişî bigêra şirîka ci ya. Ma do hesabê Denîze Poyraz  bipersê.''

Wekîlê CHPyî Sezgîn Tanrikuluyî vat: ''AKP-MHP şirîkê nê qetilkerdişî yo.''

Platformê 'Cinîyî Pîya Bihêz ê' ra Dîdale Gul vat: ''Ma do Onur Gencerî muhakeme bikerê û binê serewedaritişê Denîze. Ma zanenê ke Onur Gencer tek kiştox nîyo. Ma hol zanenê ke înanê ke verê bînaya HDPyî de qereqol awan kerdo senî rayîr da kiştoxî. Ma kiştoxan şinasnenê.''

Dadîya Denîze, Fehîme Poyraz vat: ''Înan vatêne qey do bieşkê Denîze bikişê. La ma bîyî bi hezaran Denîze. Ma do tim payan ser de bibê û têkoşînî rê dewam bikerê. Şehîdî nêmirenê.''