Dewleta tirke ya îşxalkere 23ê nîsana 2021yî de vera herêmanê Metîna, Zap û Avaşînî yê Herêmanê Pawitişî yê Medya  û Başûrê Kurdîstanî erd û hewayî ra hêrişê îşxal û îhlaqî da destpêkerdene. Artêşa tirke ya îşxalkere 3 serrî yo hêrişanê xo domnena. 16ê nîsane de vera waranê cîya cîyayan ê Metîna hêrişêko newe da destpêkerdene. 3ê temmuze de artêşa tirke bi paştdayîşê PDKyî Amediye ra heta Girê Baharî yê Zapî hêriş kerd, PDK zî kerd mîyanê hêrişanê îşxal û îlhakî û vera Gerîlayanê Azadîye yê Kurdîstanî hêrişî rê dewam kena.

Artêşa tirke ya îşxalkere û hukmatê şerî yê AKP-MHPyî hêrişê xo yê vera Herêmanê Pawitişî yê Medya û Başûrê Kurdîstanî de bitaybetî zî hêrişanê 3ê temmuze ra dima caardişanê  sey vengkerdişê dewan, vêşnayîşê dewan, vêşnayîşê erazî û bexçeyan, ronayîşê nuqtayanê kontrolî  û kontrolê nasnameyan, mîyanê dewan de ronayîşê bargehan verê çimanê dinya de kena. Pîya bi nînan hinî eşkerayo ke PDK, Barzanîyî hêrişê îşxal û îhlaqî de hetê dewleta tirke de yê.

Vera hêrişanê îşxal û îhlaqî yê dewleta tirke ya îşxalkere Gerîlayê Azadîye yê Kurdîstanî bi tunelanê şerî û tîmanê erazî cewab danê. Hêrişî bitaybetî Metîna û xeta Zapî de  giran bîyî. Seke yeno zanayene hêrişî hîrê serrî û nîm o ke dewam kenê û dewleta tirke ya îşxalker û hukmatê ci yê şerî netîceya ke wazena nêfînaya dest. Rixmê bêvengîya Iraqî, paştdayîşê PDK-Barzanîyan o bêsînorî waştişê xo nêfînayo dest.

Bi qerarnameyê bi îmzayê Serekkomarê Tirkî û Serekê Pêroyî yê AKPyî şefo faşîst Recep Tayyip Erdoganî  yê 9ê tebaxe fermandarîyanê  Hezanê Erd, Dengiz û Hewayî yê artêşa tirke de tay bedilnayîşî bîyî. Qerarname de bedilnayîşo ke tewr zaf bale anceno xo ser yê Fermandarê Artêşa 2.  Metin Tokleyî yo ke berpirsîyarê operasyonanê îşxal û îhlaqî yê teberê sînorî yê Herêmanê Pawitişî yê Medya û Başûrê Kurdîstanî bi.

Herinda Tokelî de orgernerall Levent Ergun ame cakerdene. Metin Tokel bi nêzdîbîyayîşê AKPyî yeno naskerdene. Levent Ergun zî Dewaya Balyoz ame tepiştene, wextêk Zîndanê Hasdal de mend  û bado ke agêra wezîfeyê xo ser wextê Xoverdayîşê Xoîdarekerdişî yê Nisêbînî de fermandarîye kerd û Nisêbîn rijna. Reyna xeylêk fermandarê bînî ke hêrişê îşxal û îhlaqî de ca genê ameyî bedilnayene.