Seyîd Riza û embazê ci 86 serrî verî na roje ameybî dardekerdene. Cayê goranê nînan hema zî nênê eşkerakerdene. Wina yeno texmînkerdene ke Dêrsim de tewr tay 30 gorê komkîyî, tewr tay zî 100 cayê kiştişê komkîyî est ê û zafê înan qeraxê Çemê Munzurî de yê. 

Hemsereka Komeleya Elewîyan ê Demokratan (DAD) Kadrîye Dogan serrgêra dardekerdişê Seyîd Riza û embazanê ci de ANFyî rê qisey kerd.

Kadrîye Dogan ard ziwan ke 86 serran ra dima hema zî xîret yeno kerdene ke Terteleyê Dêrsimî bêro vîrakerdene û vat: ''Cayê goranê bi hezara merdiman nêameyî eşkerakerdene. Qarê kiştişê komkîyî û goranê komkîyan est ê. Bi serran o ma wazenê ke cayê goran eşkera bibê. Dewlete ney red kena û vana 'ma kerd û binerd kerd.' Safhaya ney a diyîne zî vîrakerdiş o. Wa cayê sey Çemê Kutu, Çemê Laçî de wa cayê yadkerdişî bêrê îlankerdene. Seba ke hesab bêro persayene ganî hiş û vîr bêrê pawitene. Waranê qirkerdişî de festîval û konserî yenê kerdene. Ganî hol bêro zanayene ke nê xizmetê çita kenê. Hema zî nê terteleyî de têrîameyîş nêqewimîya.''

Kadrîye Dogan îfade kerd ke Dêrsim seba bawerîya elewîyan merkezêko girîng o û armancanê terteleyî ra yew zî çinkerdişê bawerîya elewîyan bibi.

Kadrîye vat: ''Ganî cayê hiş û bawerîye heta peynî bipawîyê. Seba caardişê nê pêroyînan zî ganî Dêrsim weçînayîşanê herêmîyan de ê kesanê ke temsîlîya înan bikerê, biweçînê. Ma wina pawenê û naye ser o bixebitê.''