HDP roja yewşemeyî Anqara de kongreya xo ya pîle do bikero. Hemserekê HDPyî yê Wanî Fîkret Doganî ANFyî rê qisey kerd û venga her kesî da ke tewrê kongre bibo.

Doganî ard ziwan ke HDP rixmê polîtîkayanê teda û zulmî zî rayraşîyayîşê xo yê rûmetênî rê dewam keno. Doganî pare kerd ke HDP nê prosesî de do kongreya xo bikero û vat: ''Ma hê amadekarîyanê kongreya xo kenê. Nê prosesî de ke Tirkîya babetanê demokrasî û heqanê merdiman de xeniqîyena, ma reyna bimojnê ke HDP nê welatî de tek hêvî ya. Ma venga şarê xo danê ke tewrê kongre bibo. Hêvî têkoşîn o, no zî pê bedelan beno. Ma do têkoşînê hêvî û demokrasî rê dewam bikerê. Ma venga şarê xo danê ke kongreya ma de cewab bido tecrîdî.''