Dima ke têkoşînê çekdarî yê PKKyî 15ê tebaxa 1984î de destpêkerd dewleta tirke hacmê gazê xo yê kîmyewîyî zêdîna. Dokumentanê nimiteyan ê dewlete de wina nusîyayêne ke gerîlayî wa pê gazê jehrînî biikişîyê. Talîmatê winasênî 15ê Tebaxe ra dima zêdîyayî û 80an de kewtî destê çapemenîye.

Dokumentê bi tarîxê 25ê sibata 1986î yê Fermandarîya Hêzan ê Xerîban ê Wezaretê Fermandarîya Tirkîya de ame waştene ke 'eke hewce bibo pê bombaya gazî bivêşnê, tunelan bidê gazê jehrînî ver.'Reya verêne talîmato ke Orgeneral Necet Oztorunî îmza kerd 23ê temmuza 1989î de kovara Doguyî de weşanîya.

Dewleta tirke hewce nêdî binimna ke depoyanê ci de gazo kîmyewî esto. 2004 de TRT de fîlmê dokumentê bi nameyê 'Yewina Antî-Terorî' de ame mojnayene ke leşkerê tirkî 'bombaya çimvêşnayîşî' xebitnenê. Rixmo ke Rêxistina Qedexekerdişê Çekan ê Kîmyewîyan (OPCW) bombaya çimvêşnayîşî qedexe kerdbî dewleta tirke tim vra gerîlayan na bomba xebitnaye.

Zanîngehê Biradorî yê Îngilîstanî serra 2010î de raporêk amade kerd û pare kerd ke Dezgehê Endustrîya Makîna û Kîmya (MKEK) bombayê CSî yê bi 120 mm ber ardî û ho roşeno. Nê bombayê ke dewleta tirke viraştbî 2010 de Fuarê Çekan ê ADDyî yê Kapstadtî de ameyî mojnayene. Rixmê hende dokumentan zî OPCWyî derheqê Tirkîya de tehqîqatêk nêda destpêkerdene.

11ê gulana 1999î, de herêma Ballikaya ya Şirnexî de zereyê şikefteyêkî de 20 gerîlayê ARGKyî ameyî qetilkerdene. Dîmenê ke artêşa tirke girewtbî 2011 de Roj TV de weşanîyayî û wina ame vatene: ''Leşkerê ma nika mîyanê nê tehlukeyî de yê ke pê jehrî bikewê. la reyna zî sey cinawiran, çêran dekewenê zereyî. Bêmabên tesîrê gazî hema zî dewam keno.'' Goreyê dîmenan fermandarê nê operasyoî Necdet Ozel o ke dima bi Serekê Fermandarîya Pêroyîye. Artêşa tirke dima îtîraf kerd ke no Necdet Ozel o la derheqê çekanê kîmyewîyan de bêveng mende û bi bê hawayî qebul kerd.

PDSyî 1999 de û Partîya Çepe 2011 de Qirkerdişê Ballikaya vist rojdemê Meclîsê Federalî yê Almanya. Heyva Sor parçeyê bombayan arê dabî û teslîmê televîzyonêkê Almanya kerdbi. Tipê Edlî yê Zanîngehê Munchenî de eşkera bi ke parçeyê bombayan de rêçê gazê CSyî yo qedexekerde estê. Kanala ''Kennzeichen D" yê Almanya nê agahîyî weşanayî û da zanayene ke nê bombayî hetê şîrketêka Almanya Buck&Depyfagî ra 2015 de ameyî rotene Tirkîya.

Êlula 2009î de nêzdîyê qezaya Çelê ya Colemêrgî de şerê mabênê artêşa tirke ya tirke û gerîlayanê HPGyî de 8 gerîlayî zereyê şikefteyêkî de kişîyayî. Şahîdan ard ziwan ke leşkeranê tirkan gazo jehrîn eşt zereyî. Heyetêkê heqanê merdiman ê Almanya şi herême, fotogradê cenazayan girewtî. Heyetî semedê cigêrayîşî fotogragî şawitî pisporan.

Dima pisporan eşkera kerd ke fotografan ser o manîpulasyon çin o û pataloganê Zanîngehê Eppendorfî yê Hamburgî dest pê cigêrayîşê fotografan kerd. Doktoran raporê xo yê 20ê temmuza 2010î de wina vat: ''Beşê cêrê bedenî de, mil û rî de ziwatîye esta. Mûyê rîyî û sineyî seke vêşîyayê asenê. Coka ganî tesîrê madeyêka kîmyewîye bêro dîyene.''

22-24ê teşrîna verêne ya 2011î de erdê qezaya Çelê ya Colemêrgî de Gelîya Qazanî de şer de 36 gerîlayê HPGyî şehîd bîyî. Cenazayî bi rojan morgê Meletî de ameyî verdayene. Dokument û agahîyê cidîyî vila bîyê ke dewleta tirke nê gerîlayî pê çeka kîmyewîye qetil kerdê. Gerîlayo ke hêrişî ra xelisîya vat ke teqayîşî ra dima dûyê bi boya meyweyan vila bîyo.