Mehmet Bal 24ê çeleyî de Êlihî ra amebi Îstanbulî. Heman roje dima ke Balî zîndan de lajê xo zîyaret kerdbi û Bagcilar de merdimê xo dîbi vîn bibi. Bi 52 rojan o ke Balî ra xeberêke çin a. Keyeyê Mehmet Balî muracatê Serdozgerîya Komare ya Bakirkoyî kerd la pêro xîretê înan bênetîce mendî.

Tewr peyêne de kameraya mobese de ame dîyene ke Bal Îskeleyê Emînonu ra nişt keştîya Kadikoyî.  Keyeyî seba teqîbê sînyalê telefonî muracatê selahîyetdaran kerd la reyna netîce nêgirewte. Serebûtî ra mengêke dima kesê bi nameyê Rustem Yilmazî keyeyî rê telefon kerd û vat ke ey Mehmet Bal dîyo. La polîsan îfadeyê Yilmazî nêgirewt.

Serdozgerîya derheqê dosyaya tehqîqatî yê Balî de bira bêteqîbîye daye.  Avûkatê keyeyê Ahmet Baran Çelîkî vat ke dosyaya tehqîqatî de zaf kêmasîyî estê.

 Çelîkî vat: ''Îfadeyê Rustem Yilmazî nêame girewtene. Asayîşî dîmenê mobeseyan zî îlaweyê dosya nêkerdî la dosya padaye. Hema zaf noqtayî estê ke ganî bêrê cigêrayene.''

 Lajê Mehmet Balî Ercan Balî zî da zanayene ke dezgehanê dewlete zaf eleqe nêmojna serebûtî. Ercan Balî vat: ''Ez têgêrayîşê dewlete ra wina fam kena ke babîyê mi destê înan de yo. Çunke nêwazenê zanayîş bidê ma û ma rê vat ke eke ma şorê uca ma kenê teberî. Ez dewlete ra babîyê xo wazena. Berpirsîyara nê serebûtî dewlet a.''