Belçîka de serra 2010 ra nata xeylî bajaran de hemverê Kurdan de ‘tacîzê mehkema’ yo hîra esto. Pîya bi merdimanê naskerdeyan, tayê merdimê aleladeyî seba ke tewrê çalakîyan bîyê, hedef de yê. Mehkemeyanê Belçîka mîyanê hîrê serran de panc reyî qerar da ke PKK organîzasyonêko terorîst nêyo. Rixmê nê de zî tacîzê dozgerîya federale dewam keno.

Endama torê avûkatan ê PROGRESS’î yê Brukselî Selma Benkhelifa derheqê meseleyî de ANF’yî rê qisey kerd.

Benkhelifa vat dozgerîya federale serra 2010’î ra nata hemverê cimatê Kurdan ê Belçîka de cipersayîş kena û vat, “Ma îdîanameyê dozgerîye de çîyêko winayên wend: ‘Qismêko pîl ê cimatê Kurdan rixmo ke zano no organîzasyonêko terorîst o ke mucadeleyê çekdarî keno, paştî dano PKK’yî.’ Bi çimêkê bigumanî ewnêna pêroyê cimatî ra. Dima ra zî dest pêkena ke xeylî merdiman goşdarî bikero. Bi her hawayî çîyêk dima şina.”

Benkhelifa da zanayene ke no nizdbîyayîş nizdbîyayîşêko biproblem o û vat, “Qanûnê ceza de gama ke binpaykerdişêk virazîya, a game yeno cigêrayene. Nizdbîyayîşo ke tîya ramojîyeno wina yo; kiryarê potansîyelî estê. Dima ra binpaykerdişê muhtemeli yenê cigêrayene. Qanûnê ceza yeno serûbinkerdene. Gama cigêrayîşî de vajê nêvajê do çîyêk bêro dîyene.”

Mazeretê Komîkî

Benkhelifa ard ziwan ke bi desan Kurdan cipersayîş ameyo akerdene û vat, “Mesele verê her çîyî sîyasî yo. Persanê winayênan kenê; şima derheqê PKK’yî de çi fikrênê? Şima derheqê Ocalanî de çi fikrênê? Haya şima bi ci esta ke PKK hetê Yewîya Ewropa ra sey organîzasyonêko terorîst yeno dîyene? Rixmê nê de zî şima paştî danê? Şima filan kesî nas kenê? Şima hetkarî danê?

Zafaneyê merdimanê ke cipersayîşê înan ameyo kerdene vanê, ‘mi çi rey pere nêdayo,’ yan zî ‘ez dana, labelê hetkarî seba merkezanê kulturî rê yê,’ ‘ez menganeyê xo yê endamîye dana.’ Dozgerî dima ra seba ramojno ke ‘bi zorî pere ameyo girewtene,’ tayê vateyanê ke ameyê cipersayene şuxulnena. La birastî zî çîyê komîk ê.”

Kombîyayîşo Nimitkî yê Sefaretxaneyê DYA

Benkhelifa vat ke çîyo ke yeno kerdene teşebusêk seba binfînayîşî yo û vat, “Ma nêzanayêne ke birastî ro çi gêrenê. Tirem tayênan waştêne hêrişêk virazê? Dima ra ma rastê belgeyanê WîkîLeaksî ameyî. Belgeya bi sernameyê ‘Belgîum: PKK Update’ ya Hezîran a 2009’î estbî. Sefaretxaneyê Berzî yê DYA yê Brukselî de, bi tewrbîyayîşê kesanê dozgerîya federale ya Belçîka û endamanê hukmatê Tirkî kombîyayîşêk virazîya. Yeno dîyene ke Tirkî Belçîkayijan ra xeylî aciz bîyê. Çunke vanê, ‘Mucadeleyê hemverê PKK’yî de seba hetkarîye şima çîyêk nêkenê.’ Eşkera yeno dîyene ke Tirkî Belçîkayijan ra wazenê Kurdanê ke Belçîka de sîyaset kenê ‘tacîz’ bikerê.’

Seba ke Kêfê Tirkîya Bîyaro…

Kombîyayîşê Hezîran a 2009’î de zemînêkê pêameyîşî peyda kenê. Dima ra dest bi prosedurî kenê. Ma fam kenê ke Belçîka seba cigêrayîşê binpaykerdişan nê, la bi waştişê sefîrê berzî yê DYA seba weşkerdişê zerrîya Tirkîya na yewe kenê. No çîyêko zaf giran o.”

Benkhelifa ard ziwan ke înan hemverê nê de razînêbîyayîşê xo ardo ziwan û dozgerêk aye ra wina vato, ‘Seba weşanayîşê belgeya WîkîLeaksî şima destûr DYA ra nêgirewto. Rast o nê belgeyi hetê Assange (Jûlîan) ra bê destûrê DYA ameyî weşanayene. La serê înternetî de yo.’ Dozgerî mi ra vat bi şuxulnayîşê nê şima sûc kenê.”

Dozgerî gefî wendî

Benkhelifa vat ke no gefêko eşkera yo û vat, “Vatişê ‘şima sûc kenê,’ hemverê ma de gefêk o. Ma vînenê ke ewro çi anê serreyê Assengeyî; seba ke ê rastîye vete meydan ê ci ra xeylî bihêrs ê. Xora çi rey nêvanê belgeye ke ê weşanayê sexte yê. Her kes zano ke rast ê. Vanê ‘hayîdarîyî’ rast bê zî ganî nêrê eşkerakerdene. No yen ona mana; tena hemverê kesanê ke belge vetê werte gefan nêwanenê, hemverê her kesanê ke ê weşanayê de zî gefan wanenê.”

Benkhelifa tewr peynî de ard ziwan ke zextê serê edaletî yê ‘tacîzkerdişê’ multecîyanê sîyasîyan, weşanayîşê belgeyanê WîkîLeaksî ra giranêr o û sûcêko hîna pîl o.