Tarîxnas û rojnameger-nuştox Nick Brauns serebûtanê Kurdîstan û Tirkîya nêzdî ra teqîb keno û heta nika nînan ser o xeylêk xitabî, meqaleyî nuştî, cigêrayîşî kerdî. Tarîxnas û rojnameger-nuştox Nick Braunsî bale ante îtîrafanê Sedat Pekerî ser û da zanayene ke welatanê rojawanî (Ewropa) cara nê çîyê ke Pekerî qala ci kerdî zanayêne.

Dr. Braunsî ard ziwan ke o zî îtîrafanê Sedat Pekerî  nêzdî ra teqîb keno û vat: ''Medyaya kurdan, HDP, sîyasetmedaranê muxalefetî û sey Can Dundar rojnamegeran qala nê serebûtan kerdêne.  Bazirganîya narkotîke, cîhadîstan rê erşawitişê çekan cara zanîyayêne û nika zî ameyî raştkerdene. Babeta narkotîke, çekan û bazirganîya petrolî ya DAÎŞî. Xora welatê Ewropa nînan zanenê. Rûsya derheqê bazirganîya petrolê DAÎŞî de dosyayêke amade kerdbi û dabi Erdoganî. Nika medyaya Ewropa zî îtîrafanê Sedat Pekerî nêzdî ra teqîb kena. Na rewşêka girîng a.''

Braunsî pare kerd ke cara hayîya Almanya pê îtîrafanê Pekerî estbî û vat: ''Rojnameger Can Dundaro ke verî babeta çekanê cîhadîstan ardbi rojdem û Tirkîya o sey terorîst îlan kerdbi hetê Almanya ra ame qebulkerdene û pawitene. Yanî hayîya Almanya pê nê serebûtan esta. Almanya na tabloya Tirkîya ra zaf ecîz bena. Pekerî qala ci kerda ke muxalafetê Tirkîya senî hetê mafya û çeteyan ra yenê gefwerdene.

Ganî waro mîyanneteweyî vera na têkilîya Tirkîya ya bi mafya, çete û cîhadîstan têbigêra. Nika HDP û partîyê sosyalîstî xîret kenê ke kampanyayêke bidê destpêkerdene. Labelê CHP heta nika çîyêk nêkerd. ÎYÎ Partîya ke sereka ci Merale Akşener zî pekerî reyde têkilîya ronaybî tersena.

Heta ke muxalefetê Tirkîya vera ney tênêgêro Almanya zî do bêveng bimana. Yanî seba têgêrayîşê Almanya bahaneyêke lazim a, goreyê mi Almanya kampanya û xîretanê muxalefetî de gêrena na bahane. Bi heman hewayî welatê bînî yê rojawanî zî hê pabeyê tewirê muxalefetê Tirkîya yê.''