Vîrusê Korona şaristanê Wuhanî yê Çînî de vejîya werte û dima pêro dinya de vila bi. Rêxistina Weşîye ya Dinya pare kerd ke vîrusê Korona vurîya ''pandemîya globale.''

Serekê Odaya Tabîban a Amedî Dr. Şerîf Demîr derheqê pawitişê Korona, rîskê vilabîyayîşê Korona yê Kurdîstan û Tirkîya de ANFyî reyde qisey kerd.

Dr. Demîr vat: ''Vîrusê Korona tewirêkê serdgirewtiş o. Adir, kixe, viritiş, qelibîyayîşê zereyî, îshal û dejê sereyî tay eşkerayîyanê ci ra yê. Xora nê çîyî nêweşo ke serd girewto de zî estê. Naye ra ma hewceyê hîkayeyê nêweşan ê. Ganî ma biewnê ke nê nêweşî şîyê Çîn, Îtalya, Îran ûsn ke uca de Korona esta. Yan zî ganî ma biewnê ke nê nêweşan, nêweşanê Korona reyde temas kerd yan ney.

Her serre Tirkîya de enfeksîyonê grîbalî (Serdgirewtiş) ra tewr tay 70 hezar kesî mirenê. Coka hewce çin o ke ma semedê Korona ra hende panîk bikerê. Ganî ma hîna zêdêr bala xo bidê ser ke ma senî eşkenê nê vîrusî ra pakî bibê, xo senî vera nê vîrusî bipawê. Xopawitiş weşkerdişî ra hîna girîng o. Ganî ma xo Korona ra bipawê.Seba naye zî derzînpirodayîş zaf girîng o. Bi taybetî ganî merdimê ke bedenê ci qels ê û nêweşîê înan ê kronîkî estê ganî derzîn bidê xo ro. Reyna ganî ma bi hawayêkê nîzamî seba ke sîstemê ma yê bedenî bihêz bibê werd biwerê.''

Dr. Demîrî bi hawayêkê xurtî ard ziwan ke merodê xopawitişî ganî bêrê caardene û vat: ''Ma ganî her çî ra verî giranîye bidê hîjyenê destan. Ma ganî destê xo û mîyanê engiştanê xo her 20 sanîyan de yew bişowê. Ganî ma wexto ke kixenî pê destê xo yan zî pê peçeteyêkî fekê xo bigêrê. Ganî ma kesanê ke kixenî û fişkenê ra dûrî vinderê û cayanê hewadaran de bimanê. Hewce çîn o ke her kes maske bixebitno. Êyê ke nêweş ê eşkenê maske xo ra bidê ke nêweşîye vila nêba. Yan zî êyê ke nêweşxaneyan de xebitîyenê eşkenê maske bixebitnê.''