Dr. Nemam Ghafourî bi nameyê Heyva Sore di hewteyê Kampa El Holî ya Sûrîye de mende û bale ante serê rewşa cinî û domananê Êzidîyan ê ucayî. Dr. Ghafourî hîşyarîye daye û ard ziwan ke domanê ke rîyê tecawuzê çeteyanê DAÎŞ'î ra ameyê dinya, ameyox de beno ke bibê sebebê persêka girde. Dr. Ghafourî vat, “Ma qalê yew yan zî di domanan nêkenê. Tewr kêmî 500 domanî estê. Çareserkerdişê na perse karêko asan nîyo.”

Dr. Nemam Ghafourî, dezgehê bi nameyê "Joînt Help for Kurdistan"o ke seba hetkarîya cinîyanê Êzidîyan ê Başûrê Kurdistanî xibetîyeno de bi zerrîweşîye wezîfe kena. Dr. Ghafourî bi nameyê Heyva Sore di hewteyî Kampa El Holî ya Sûrîye de mende û bado agêraye Swêd. Ghafourî, kitabxaneyê Kurdî yê Swêdî de, semîrêk de derheqê gêrayîş û nîyadayîşanê xo de qisey kerd. Dr. Ghafourî da zanayene, a 5 serrî yo kampa bextwaştoxan ê Iraq û Sûrîye de doktorîye kena, labelê kampa El Holî mîyanê nê kampan de kanpa tewr xirabin a bextwaştoxan.

Cinîyê Êzidî nêeşkenê hetkarîye bigêrê

Dr. Ghafourî da zanayene, zafêne yê ke kampe de manenê cinî û domanê gij ê û ard ziwan, bi hezaran cinîyê Êzidî uca de ameyê xovîrakerdene û nêeşkenê hetkarîye bigêrê. Dr. Ghafourî ard ziwan ke rewşa domananê Êzidîyan goreyê domananê bînan xirabêr a û vat, “Neteweyê Yewbîyayeyî bi domanê Ereb, welatê xerîbî zî  bi domananê ke welatanê înan şîyê eleqedar benê. Labêl kesêk bi domananê Êzidîyan eleqedar nêbeno.”

Travmaya Cinîyanê Êzidîyan

Dr. Ghafourî bi rayîrê dîmen û fotografanê ke El Holî de ante, serê rewşa cuya cinîyan a Êzidîyanê kampe de zanayîşî dayî. Dr. Ghafourî ard vîrî ke, hûmara goranê pêserîyan ê Êzidîyan  ê ke ameyê dîyayene, bi nê hewteyê peyênî restî 80’î û vat, “Nê gorî yenê akerdene û cehd kenê ke qurbanî bêrê eşkerakerdene. No seba cinîyanê Êzidîyan travmayêka newe ya. Cinîye dî ke esteyê çar birayan aye çar tewreyan de ameyê cakerdene. Yewe zî dî ke esteyê pîyê aye û birayê ci yê qij tewreyan de ameyê cakerdene. Roja  destpêka hêrişanê DAÎŞ'ê de hezar û 293 Êzidîyî ameyî kiştene. Hîna zî 3 hezar vîndîbîyayî yê.”

DAÎŞ’ijî hîna nê cayan de yê

Dr. Ghafourî da zanayene, wexto ke teze kewtê mîyanê Kampa El Holî, cinî û domanan ê Êzidîyan ra gêrayê, labelê bi zehmetî ê dîyê, çunek seba ke nêbê hedefê hêrişanê çeteyanê  DAÎŞ'î  xo wedayo. Dr. Ghafourî vat, “Hama hama temamê DAÎŞ'ijî ardî Kampa El Holî. Înan nê cayan de zî xebatê xo dewam kerdî. Xo rêxisitn kerd. Cuya xo, rêxisitinbîyayîşê xo verê çimanê Neteweyê Yewbîyayeyî, rêxistinanê mîyanneteweyî û rejîmê Sûrîye de dewam kerd. Kampe de Erebbîyayîş, Muslumanbîyayîşê înan kampê statuyêk dano înan.”

Hêrişê vera wezîfedar û rojnamegeran

Dr. Ghafourî ard ziwan ke kampe de kesê ke welatanê bînan ra ameyî û tewrê DAÎŞ’î bîyê, zulmo tewr giran înan Êzidîyan rê kerdo û vat, “Dimayo ke ê ameyî kampe, kemerî eştî wezîfedaranê kampe, kedkaranê weşîye û rojnamegeran. Kerdêne qîreqîre û vatêne, 'Xelîfetîye do biciwîyo. Ma domanê înan ê. El Bagdadî do bêro û ma bixelisno. Xelîfetîye do newe ra awan bibo '."

Neteweyê Yewbîyayeyî Berpirsîyarîya nêanê ca

Dr. Ghafourî da zanayene, DAÎŞ'î têsîrê bi domanan keno û domananê ke kampe de manenê vanê, 'Xelîfetîye ma reyde do biciwîyo’. Ghafourî vat, “Eke tedbîr nêro girewtene, çîyo ke nê vanê do bêrê viraştene. Xelîfetîye înan reyde do biciwîyo.”

Mecbur mendî ke bûrka xo ra biderê

Dr. Ghafourî ard ziwan ke, Kampa El Holî de înan 3 cinîyê Êzidî dîyê û înan ra yewe  '19 reyî ameya rotene’. Dr. Ghafourî fotografêk mojna û da zanayene ke cinî seba ke bieşkayê merdimanê xo yê ke hetê DAÎŞ'î ra ameyê remnayene bivînê, mecbûr mendê ke bûrkayê sîyayî dayê xo ra.

Tewr kêmî 500 domanî!

Dr. Ghafourî bale ante serê domananê ke rîyê tecawuzê çeteyanê DAÎŞ'î ra ameyê dinya û  ard ziwan ke nê domanî nika û wexto ameyox de rayîrê persanê girdan ê cimatkî abikerê. Dr. Ghafourî vat, “Ma qalê yew yan zî di domanan nêkenê. Tewr kêmî 500 domanê na rewşe de yê. Winî aseno ke çareserkerişê na perse karêko asan nîyo.”

DAÎŞ’ijê 56 welatan

Dr. Ghafourî da zanayene ke Kampa El Holî de sere de Tacîkîstan, Ozbekîstan, Cezayîr û bi domanê înan 56 welatan ra DAÎŞ’ijî estê; mîyanê nînan de nêzdîye 70 domanê Swêdî zî estê.

Bazirganîya merdim û koleyan dewam kena

Dr. Nemam Ghafourî tewr peynî de vat, “Hîna bazirganîya merdim û koleyna dewam kena. Her çî ra ver herêmanê Îdlîb û cayanê ke Tirkîya kontrol kena de. Kampa El Holî ya ke 74 hezar kes tede yo, kontrolo cîdî çin o. Tayê bi asanî kewenê kampe û vejîyenê.”