Derheqê 25. serrîya qedexeyê serê PKKyî de 20ê Teşrîna verêne roja şemeyî do konferansêko hîra paytext Berlîn de bêro viraştene. Sernameyê konferansî „Qedexeyê PKKyî yo 25 serre – Zextê 25 serrî û demokrasîya ke xizmetê sîyasetê teberî yê Almanan de ya“ yo. 

Konferans salona banê "Karl-Liebknecht-Haus"î de yeno viraştene û hetê Komela Azadî, Komela Mîyan-neteweyîye Seva Heqanê Merdiman û Demokrasî (MAF-DAD), Komela Pawitoxan Seva Heqanê Merdiman (EJDM/ELDH) û Îdarekarîya Federale ya Roten Hilfe ra bi hawayêkê hemparî yeno organîzekerdene.   

'ALMANYA KURDAN SEY KOZ ŞUXULNENA'

Îdarekaranê Komela Azadîye ra Dr. Elmar Millichî derheqê konferansî de ANFyî rê qisey kerd û vat amadekarîyê konferansî temam ê û ard ziwan ke girêdayeyê sîyasetê teberî yê Almanya qedexeyê serê PKKyî 25 serrî yo bêmabên dewam keno. 

Dr. Millichî ard vîrî ke kîşta qedexeyê PKKyî de sembolê PYD û YPG/YPJyî zî ameyê qedexekerdene û dewleta Almanya wazena ke mueyîdeyanê hemverê Têgêrayîşê Azadîye sey koz hemverê Tirkîya de bişuxulno. 

'ÇEPGÊRÊ ALMANÎ ZÎ HEDEFÊ DEWLETE DE YÊ'

Millichî dewamê qiseykerdişî de ard ziwan ke nizdbîyayîşanê welatanê Ewropa yê bînan ra cîya Almanya wayîrê stratejîyêka xasî ya û vat: „Çunke Almanya de nufûsêka zafe ya kurdan esta.

Ma do çarçiwaya heqanê huqûqîyan de biewnîrê eşkenê se bikerê. Xusûsî zî derheqê wedartişê  qedexeyê serê sembolanê PYD, YPG/YPJyî de tirêm eşkenê se bikerê ma do munaqeşe bikerê.“ 

'KOFERANS KESÊ KE HEMVERÊ QEDEXEYÎ DE MUCADELE KENÊ ANO TÊHET'

Konferanso ke do serê sibayî ra heta şand dewam bikero, ê de yeno pawitene ke nê nameyî qisey bikerê:

Pawitoxe Edith Lunnebacha ke muhakemekerişê hemverê sîyasetkaranê kurdan ê 1988 de Dusseldorf de virazîyabi ca girewtebî.

* Sîyasetkaro kurd Mehmet Demîr

* Xebatkara Komela Azadî Monika Morres

* Pawitoxanê ke tewrê muhakemekerdişanê dadgeha ke Belçîka de qerarê „PKK organîzasyonê terorî nêyo“ dabi ra Jan Fermon

* Tamara Buruma ke pawitoxa dewaya seva ke Dîwanê Edaletî yê Ewropa de PKK lîsteya „Organîzasyonê terorîstî yê Yewîya Ewropa„ ra bêro vetene

* Lukas Theune ke Almanya de pawitoxanê sîyasetkaranê kurdan ra yo

* Dr. Peer Stolle ke serekê Komela Pawitoxanê Komarperweran o

* Edîtoro verên ê WDRyî Jürgen Hoppe

* Parlamentera Eyaletê Hamburgî Cansu Ozdemire

* Îdarekaranê Komîteya Demokrasî û Heqanê Bingeyênan ra Heiner Busch