Halîl Şenî bajarê Dresdenî yê Almanya de serrgêra Komployê 15ê Sibate de vera tecrîdî xo vêşnabi. Dresden de 3ê adare de (siba) semedê Şenî do merasîmê cenaza bêro kerdene.

FED-KURDî ke eşkerayîya nuştekîye daya da eşnawitene ke ê do 3ê adare de saete 14:00 de verê DKTMyê Dresdenî de merasîmêk bikerê û semedê tewrbîyayîşî veng da.

Eşkerayîye de wina ame vatene: ''Halîl Şen serra 1971î de dewa Ludê ya qezaya Dihê Sêrtî de ame dinya. Gama ke serkêşîya Fermandar Mahsûm  Korkmazî de gerîlayanê azadîye yê kurdan Dih de derba verêne ya leşkerî daye dewleta tirke ro embaz Halîl hema domanêko 13 serre bi. Ê rojan de herra mergî serê kudan ra ameyêne arêdayene û xoverdayîşî destpêkerdêne. Emaz Xelîl tim pê coşê a roja verêne xebitya û emrê xo da mucadeleyê seba azadîya Kurdîstanî.''

FED-KURDÎ vat: ''Embaz Halîlî 12ê sibate ya 2021î roja îneyî saete 13:30 de bajarê Dresdenî ke paytextê eyaletê Saksonya yê Almanya yo de verê banê parlamentoyî de xo vêşna û şehîd bi. Teorî û pratîkê embaz Xelîlî ganî semedê kurdanê ke dîaspora de ciwîyenê sey manîfestoyêk bêro destgirewtene.''

FED-KURDî da zanayene ke merasîmê cenazaya Halîl Şenî 3ê adare de saete 14:00 de verê DKTMyê Dresdenî (Oschatzerstr. 26) do bêro kerdene û veng da kurdîstanijan ke wa tewrê merasîmî bibê.