Lajê xoverdayoxanê grevê vêşanîye ra Yuksel Koçî, Mazlûm Koçî bi nameyê keyeyanê xoverdayoxan, Sekreterê Pêroyî ya Konseya Ewropa (KE) Thorbjorn Jaglandî rê mektubêk şawite û wezîfeyê înan ard vîrî.

Strasbourg de vera tecrîdkerdişê Rayberê Şarê Kurdî Abdullah Ocalanî  98 rojî yo 14 xoverdayoxî grevê vêşanîye de yê û rewşa înan krîtîk a. Coka vengdayîş bi CPT û KE'yî rê ame kerdene ke berpirsîyarîyanê xo bîyarê ca.

Mektube de tecrîd ame vîrardene û ama vetene, “Tecrîd, sûcê merdimîye yo. Tirkîya hem qanûnanê mîyanneteweyî, hem zî qanûnê xo binpay kena.”

Mektube de ame vatene, weşîya xoverdayoxan her ke şina xirabêr bena û eke çalakwanan ra kesêk cuya xo vîndî bikero, CPT û KE do berpirsîyar bibê.

Mektube de ame vatene, “Leyla Guvene, bi hezaran xoverdayoxanê zîndanan, Nasir Yagiz û Kanada, Almanya, Galler, Hollanda, Îngîlîstan, Awûstûrya û Swîs de bi hezaran xoverdayoxî grevê vêşanîye de yê û keyeyê  înan zî sey ma mîyanê ters û qesawetan de yê. Waştişê înan zaf bi merdimî yê û heqêkê bingeyênî yê, seba haştîye û demokrasî yê.

Qerarê şima yo ke bi nameyê Konseya Ewropa 22'ê Çele de girewto, madeyê 11. de xora waştişê xoverdayoxan o ke “Ocalan keye û avûkatanê xo reyde pêvînayîşan bikero”, gêno xo mîyan. Hetê bînî ra, bi roniştişê 13'ê Adara 2019’î  ameyo vînayene ke êdî dewleta Tirkî, dewletêka huqûqî nîya, coka ganî muzakereyê ci yê endamîya YE'yî bêrê wedaritene, no qerar zî hetê Parlamentoyê Ewropa ra amebi girewtene.

Waştişê keyeyanê xoverdayoxan o yo ke hîna ke kesêk cuya xo vîndî nêkerda, Sekreterîya Konseya Ewropa bikewa mîyanê têgêrayîşî û waştişanê xoverdayoxan bîyara ca.”

Mektube de ame vatene, ”Eke xoverdayoxan ra kesêk cuya xo vîndî bikero, ma keyeyê xoverdayoxan, seba ke rolê xo nêardo ca Konseya Ewropa û CPT'yî do berpirsîyar bivînê. Coka şima ra ricaya ma a ya, xoverdayîşê grevê vêşanîye sewîyeyêka krîtîke de ya, hîna ke bi kesî çîyêk nêbîyo, waştişê xoverdayoxan bêrê ca û zext bi Tirkîya bikerê.”