Serekê verênî yê Dayîreyê Îstîxbaratî yê Fermandarîya Pêroyî Îsmaîl Hakki Pekînî kanalê CNN Turkî de 16ê sibate de bernameyêk de pare kerd ke ganî vera îdarekaranê KCKyî hêriş bêro kerdene. Pekînî nê bernameyî de Qirkerdişê Parisî îtîraf kerd û vat: ''Ewropa de zî îdarekarê înan estê. Ganî ma çîyêk bîyarê înan ser. Yanî verî Paris de amebi kerdene, heya.''

Pekînî îtîraf kerd ke qirkerdişo ke 9ê çeleyî yê 2013 de paytextê Fransa Paris de ame kerdene û Ronayoxanê PKKyî ra Sanîne Cansiz, Temsîlkara KNKyî ya Parisî Fîndane Dogan û Endama Têgêrayîşê Ciwanîye yê Kurdan Leyla Şaylemez ameyî qetilkerdene hetê hêzanê Tirkîya ra ame kerdene.

Pîsporê îstîxbaratî yê Almanya Erich Schmidt-Eenboomî vatişê Pekînî ANFyî rê ercnayî.

Eenboomî ke pê cigêrayîşanê xo yê Qirkerdiê Parisî û falîyetanê MÎTî yê Almanya û Ewropa yeno zanayene bale ante ser îtîrafê Pekînî eşkeno prosesê hukmî yê Fransa ser o tesîr bikero. Eenboomî ke Paris de qirkerdişê hîrê cinîyan şorişgêran sey terorê dewleta tirke name kerd vat: ''Eke Fransa biwaze eşkena terora dewleta tirke ceza bikero.''

Eenboomî derheqê hedef ramojnayîşê sîyastmedaranê kurdan ê Ewropa de zî wîna vat: ''Semedê Almanya ters hewce nêkeno. Senî ke ez tima vana MÎT nêeşkeno Almanya de cînayet bikero. Hukmatê Almanya pîya bi wertaxanê xo yê bînan yê ewropayîjan na babete de tedbîrî girewtî. Xebatê îstîxbaratê tirkî yenê teqîpkerdene eke hewce bikero ê yene tebersînorkerdene. Fikrê mi oyo ke seba ke çîyo wînayên nêro kerdene înan rê zext yeno kerdene.''

Erich Schmidt-Eenboomo ke Serekê Enstîtuya Cigêrayîşê Poîtîkayanê Haştîye yo par menga hezîrane de programêkê  kanalê ZDFyî de semedê vatişanê berpirsîyaranê MÎTî Erhan Pekçetîn û Aydin Guneyî yê derheqê Qirkerdişê Parisî de vatbi, 'nê zanayîşê ke yenê dayene merdim tira bawer keno'.

Erich Schmidt-Eenboomî vist vîrî ke îsîxbarat û yewîyanê asayîşî yê Fransa zanayîşê ke derheqê talîmatê suîqestê Parisî Erdoganî bi xo dayo ke destê înan de bî, dayî dozgerîya Fransa û nê dosyaya cigêrayîşî de ca genê û vat: ''Hukmatê Almanya seba ke çîyo sey serebûtê Parisî welatê ci de mebo  pê xeta sûre meverê Anqara hîşyar kerd.''