Îmzakerdoxê deklarasyonê 'Vengdayîşê Haştîye' ra pawitoxê heqanê merdiman Akin Birdalî vat, “Eke tecrîdê serê Abdullah Ocalanî wedarîyo, Tirkîya de tecrîd qedîyeno. Ganî her kes goreyê nê têbigêro. ”
78 rojnameger, sîyasetmedar, roşnvîr, hunermend û kesayetan Îstanbul de seba çareserîya meseleya kurdan ameyî têhet û deklarasyonê 'Vengdayîşê Haştîye' eşkera kerd. Deklarasyon de ame waştene ke wa tecrîdê serê Rayberê Şarê Kurdî Abdullah Ocalanî biqedîyo.
Îmzakerdoxê deklarasyonê 'Vengdayîşê Haştîye' ra pawitoxê heqanê merdiman Akin Birdal û Serekê Pêroyî yê EHPyî Hakan Ozturkî derheqê deklarasyon û polîtîkayanê tecrîdî de ANFyî rê qisey kerd.
Akin Birdalî deklarasyon sey cehdkerdişê hemparî name kerd û vat waştişê deklarasyonî o yo ke vera şeranê Tirkîya û Rojhelatê Mîyanênî bala rayapêroyîye biance û netîceyanê şerî ramojno.
Akin Birdalî seserra komare semedê wedaritişê tecrîdî sey fisetêkî hesibna û nê vatî: “Welatê ma û Rojhelatê Mîyanênî mîyanê çemberê adirî de yê. Sebebê xeylêk krîzan polîtîkayê şerî yê îqîtdarî yê. Ma kewnê seserra newî ya komare. Eslê xo de no semedê haştîya komelkî firsetêk o. Bi qedînayîşê tecrîdî berê demokrasîyî eşkeno bêro akerdene, berê haştîye eşkeno bêro akerdene. Belka no beno bingeyê têrîameyîşê neweyî zî. Cunke seserra Tirkîya seserra sûcdar a. Heta ke têrîameyîş mebo vîrakerdiş mumkun nîyo. No vengdayîş semedê îqtîdarê sîyasîyî firsetêk o. Ez hêvî kena ke goş danê nê vengdayîşî. Cehdkerdişê ma yo bîn zî est o, ey zî ma do pêra pare bikerê.”
Birdalî ard ziwam ke bedelê tecrîdê serê Rayberê Şarê Kurdî Abdullah Ocalanî do giranêr bibê û wina vat: “Eke ma semedê haştîye, edalet, û azadîye merê têhet, Tirkîya do açarîyo tecrîdî. Eke merdim têna maneno, komelêk têna yeno verdayene, nêeşkeno bi ziwan, kultur û bawerîya xo vajo ez est a. Huner û kulturê ci yeno qedexekerdene, çapemenîya azade yena bêvengkerdene, qelemî yenê şiknayene, xora komel binê tecrîdî de yo. Nê semedî ra ganî tecrîdê serê Rayberê PKKyî Abdullah Ocalanî biqedîyo, tecrîdê Tirkîya biqedîyo. Ganî her kes goreyê nê têbigêro.”
Hakan Ozturkî zî bale ante eşkerayîyanê Serekkomarê Tirkî Tayyip Erdoganî yê ke badê hêrişê Îsrailî yê vera Fîlîstînî ameyî dayene ser û vat vengdayîşê Erdoganî yê semedê Fîlîstînî semedê Tirkîya zî vîyartbar ê.
