Dima ke aparatê şerê gemarinî yê tirkî Sedat Pekerî îtîraf kerd ke Kutlu Adali pê organîzasyonê Mehmet Agar û Korkut Ekenî kişîya cînayetê dewleta tirke yê Qibrisî bîyî rojdem.Dewleta tirke verî ke Vakurê Qibrisî de Kutlu Adali kişt Başûrê Qibrisî de Serekê Komîteya Paştdayîşî ya Kurdîstanî Thefilos Georgiadis kişt. Bêguman no cînayet karê Abdullah Çatliyî bi.

Serekê Komîteya Paştdayîşî ya Kurdîstanî Thefilos Georgiadis 20ê adara 1994î de verê keyeyê xo de bi hedefê guleyan û bi şehîdê têkoşînê hemparî yê şaranê helenan û kurdan.

Thefilos Georgiadis 1957 de Lefkoşa de dadîya xo ra bi. Babîyê ey Pampos Georgiadis Endamê Rêxistina Milî ya Şerwanan a Qibrisî (EKOA) bi. Thefilos Georgiadis pê tesîrê fikranê babîyê xo bi pîl. Dima ke keyeyê Thefilos Georgiadisî zî sey ê bînan hêrişê dewleta tirke de koçê taxêka bêterefe ya Lefkoşa kerd.

Thefilos Georgiadisî Zaningehê Panteinoyî yê Atina de têkoşînê kurdan şinasna û 1988 de Lefkoşa de Komîteya Paştdayîşî ya Kurdîstanî awan kerde. Na komîte reyde Thefilos Georgiadisî rojnameyê ''Vengê Kurdîstanî'' awan kerd.

Thefilos Georgiadis o çax bi hedefê MÎTî. Derheqê serebûtanê Kurdîstanî de medyaya Qibrisî û Yunanîstanî tim fikrê ey girewtêne. Thefilos Georgiadisî wina cewab dabi lomeyê 'Rewşêka winasêne de herinda ke ti girawe de vera kolonyalîzmê dewleta tirke têkoşîn bikerî çira enerjîya xo danî kurdan?': ''Rewşa kurdan tedaya dewleta tirke ra semed lezabez a, verî ganî kurdî azad bibê çunke têkoşînê înan têkoşînê ma yo zî.''

20ê Adara 1994î, 22.15

Thefilos Georgiadis 12-13ê adara 1994î de Bruksel de tewrê konferansê kurdan beno û wexto ke agêreno seba Newroze dest pê amadekarîyan keno. Ê rojan de 'Tugayê Qesasî yê Tirkan' xeylêk reyî Thefilos Georgiadisî rê gefan wanenê. Thefilos Georgiadis 20ê adare de seba Newroze meymananê xo meydanê teyarayan ra gêno û beno tay keyeyan de ca keno.Thefilos Georgiadis saete 22.15 de pê wesayîtê xo reseno verê berê xo. Wexto ke Thefilos Georgiadis wesayîtî ra peya beno 5 guleyî erzîyenê ci ser. Thefilos Georgiadis cayê serebûtî de mireno.

Vervatoxê hukmatê ê çaxî Yoannis Kasulidisî eşkerayîya hukmatî de pare kerd ke cînayet karê ajananê tirkan o.

Endamê hêzan ê paramîlîteran ê dewleta tirke Abdullah Çatliyo ke cînayetê Kutlu Adaliyî reyde xeylêk serebûtê tarîyî yê Qibrisî organîze kerdî cînayetê Thefilos Georgiadisî ra verî şibi Qibris û nazirganê narkotîkî Hassan Zortîyî reyde têkilîye viraştbi. La semedo ke Zortîyî bazirganê narkotîkî yo bîn îqna nêkerd plan eşkera bi û nê kesî serebût îxbar kerd.

Çatliyî dima birayî Andreas û Kypros Aristodimosî reyde pêkerd. Cînayetê Thefilos Georgiadisî ra dima Kypros Aristodimas Limassol de sey merde dîya û nîsana 1995î de dosyaya cînayetî ameye qefilnayene.

Thefilos Georgiadis sey şehîdê têkoşînê hemparî yê şaranê Helenan û kurdan ame qebulkerdene. Nameyê ey dîya Merkezê Kulturê Kurdan ê Qibrisî. Rayberê Şarê Kurdî Abdullah Ocalanî seba ey wina vatbi: ''Embaz Thefilos Georgiadis vera kolonyalîzm hêrsbîyaye bi, barbarîya dewleta tirke ya vera kurdan sey barbarîya vera şarê xo dîye. O zerrîya ma de wayîrê hûrmet û heskerdişî yo. O embazêko ercîyaye bi. Ma do tim ey yad bikerê û seba vîrameyîşê ey çi hewce keno bikerê.''