Qezaya Elbîstanî ya Gumgumî de 3ê kanûne de babî û dadîya di domanan ê astengkerdeyan Elîfe Kisa bi îdîaya 'hetkarîya rêxistine' ameybî tepiştene û îtîraz ser o babî û îdarekarê HDPyî yê Elbîstanî Alî Kisa amebî veradayene la Elîf Kisa hema zî tepişte ya. Avûkatê Elîfe Kisa Ozgur Çikinî îfade kerd ke Elîf Kisa 5 tewir dermanan wena û nêweşa giran a, hem zî miqata di domananê xo yê astengkerdeyan bena.

Çikin ard ziwan ke Alî û Elîfe Kisa wexto ke reya diyîne ameyî destbendkerdene dosya ser o bira nimitkîye ameye dayene û ê nêşkayê ke derheqê dosya de wayîrê zanayîşî bibê. Çikinî vat ke muwekîlê ci seba ke tepişteyanê Sûrîyeyîjan rê ke wasîyê înan Elîfe û Alî Kisa yê pere erşawenê û Newroz de, zîyaretê goristanan de fotografê înan estê ameyî tepiştene. Çikinî vat: "Muwekîlanê mi rê ame perskerdene ke înan çira sûrîyeyîjan rê pere erşawenê û kamî înan ra waşt ke ê bibê wasî. Muwekîla mi Elîfe kisa 3 serre pere erşawit tepişteyanê sûrîyeyîjan ke seba ke tepişteyî hewcedarîya xo peyda bikê. Seba tepişteyêkî pere erşawitiş qanûnî yo. Sucê ke îsnadê Elîfe Kisa yenê kerdene suc nîyê. Di domanê astengkerdeyî yê Elîf Kisa estî. Alî Kisa îtîrazê ma ser o ame veradayene la îtîrazê bira Elîf Kisa ser o ame redkerdene. Merdimêka 60 serre ganî bi şertê kontrolê edlîyî bêra hukmkerdene." Domananê Elîfe Kisa ra Îsmaîl bi giranî astengkerde yo û ganî dadîya ci miqatê ci biba. Çikinî vat: "Îsmaîl wazeno ke dadîya ci bêra. Ez şîye mi Elîfe Kisa dîye. Rewşa weşîya ci seba zindan de mendişî baş nîya. Ma xîret kenê ke roniştişê bînî yê Elîfe Kisa de aye zindan ra vejê. Sucê ke îsnadê ci benê xora suc nîyê. Sebeb çin o ke Elîf Kisa sey tepişte bêra hukmkerdene."