Verê zîyaretkerdişê Serokkomarê tirkî Recep Tayyîp Erdoganî yê Almanya, Rojnameyê Der Tagesspiegelî da eşnawitene ke Mudirîya Emnîyetî ya Berlînî de polîsêko îstîxbaratê tirkî rê xebitîyeno, derheqê ci de tehqîqat dîyayo dest pêkerdene.

Ame vatene ke no polîs paytêxt Berlîn de seba sersefîrê tirkî, ê ke muxalîfê Erdoganî yê, derheqê înan de zanayîş arê dayo. Polîso ke nasnameyê ci nimite tepişîyeno, yeno vatene ke belgeyê ajanîya ey zî estî la tehqîqatê dozgerîya Berlînî nimite tepişîyena.

Goreyê eşnawitişî o ke polîso ajan zanayîş dayo ci, endamê MÎTî yo û bi nasnameyê dîplomatê tirkî yeno şinasnayene. Nê skandalî ra dima Wezîrê Karê Zerrî yê Eyaletê Berlînî Andreas Geiselî dazanayene ke ê nê qewîmîyayîşî ra xeberdar î, la derheqê mesela de qisey nêkerd.

Îdarekaranê Emnîyetê Berlînî Kovara Focusî rê qisey kerd û va ke tehqîqat rameno. Tehqîqat zîyaretê Erdoganî ra ver çapemenîye de vejîya û no zî eleqeyê merdimî anceno.

ALMANYA AJANANÊ MÎTÎ PAWENA

Xeylê wexto yeno zanayene ke dewleta tirkî cîya-cîya rayîran ra ajananê xo Almanya de ca kena. Rejîmê Erdoganî sere de dezgehê dîyanetî DÎTÎB, konsolosxaneyan, şîrket û bankayanê tirkan de ajanananê xo ca keno. MÎTî yewîya polîsan ya almanan de zî xo ca kerdo û derheqê kurd û tirkan de zanayîş arê dano. Xora serrêko ke no rojeva Almanya de yo.

Almanya de 6 hezar ajanê MÎTî yê aktîfî xebitîyenê. Dewayê ke derheqê nê ajanan de abîyî tena sey sembolî yî. Vatiş de dewa esta, la raştîya xo de nê ajanî nînê mehkeme kerdene. 5 serranê peyênan de nizdîyê 20 ajananê MÎTî rê tehqîqat ame akerdene la qet yew ra zî tiway dest nêkote.

Bajarê Wiesbadenî yê Eyaletê Hessenî de serkomîser Dondu Yazgan ke MÎTî rê xebitîyayêne û ANF par nameyê ci deşîfre kerdbi, hema sey karmendêk Mudirîya Emnîyetî ya Hessenî de xebitîyeno.