Di endamanê Meclîsê Temsîlkaran ê Amerîka David Cicilline û Gus Bilirakisî pê mektubêke Wezîrê Karanê Teberî Anthony Blinkenî ra waşt ke teknolojîya droneyan hînî nêra rotene Tirkîya. Mektube de ame vatene ke  Teyarayê Bêmerdiman ê Qijî (SÎHA) hetê dewleta tirke ra Karabag, Kurdîstan, Sûrîye û Lîbya de vera polîtîkaya teberî ya Amerîka û vera krîteranê heqanê merdiman şuxilîyenê. Mektube de ame parekerdene qedexekerdişê rotişê teknolojîya droneyan vera îqtîdarê AKP-MHPyî bibo gamêka verêne.

Wird endamanê kongre mektuba xo pêşkêşê îmzaya endaman ê bînan zî kerde. Mektube de polîtîkaya teberî ya Tirkîya sey hêrişker û şerwazî ameye pênasekerdene. Wezîrê Karanê Teberî Bilinkenî û selahîyetdaranê bînan ra ame waştene ke na rewşe bêra ercnayene.