Partîya Demokratîke ya Şaran (HDP) binê dewaya qefilnayîşî û zextanê giranan de konraya xo ya pancine kena. Endamê Meclîsê Partîye yê HDPyî Dogan Erbaşî derheqê kongreya ke do 3ê temmuze de Anqara de bi tewrbîyayîşê xurtî bêro kerdene de ANFyî rê qisey kerd.

Erbaşî vat: ''Hetêkî ra dewaya qefilnayîşî, dewaya Kobanê, operasyonê qirkerdişê sîyasîyî û hetê bînî ra polîtîkayê şerî, krîzê ekonomîkî yo ke her roje xorîyêr beno, bazarîya leyminê ya ke Tirkîya titîkê NATOyî de rayra berde. Yanî proseso ke polîtîkayê îqtîdarî yê vera kuran resayê merhaleya tewr berze de ma kongre kenê. Têkoşînê ma yo tarîxkî est o. Şarê kurdî rixmê heme hêrişan payra yo û bi têkoşînî wayîrê heqanê xo vejîyeno. Belka nê polîtîkayanê hêrişî yê vera ma qerardarîya ma yê têkoşînî ser o dahîna zaf tesîr kerd. Ma bi coş û heyacanî ver bi kongre şinê. Nê hêrişî û astengkerdişî nêeşkenê verê ma bîgêrê. Ma do 3ê temmuze de Anqara bi şîarê 'Çare ma yê, sozê ma est o' kongreya xo bikerê.''

Erbaşî bale ante blokê îqtîdarî yo ke şer û tecrîdî wazeno, ameyoxî tarî keno û dişmenê şaran o ser û vat: ''Hetê bînî de blokê muxalefetî est o ke îqtîdarî rexnê keno la waştişê şarî rê cewab nêbeno û alternatîfêkê demokatîkî teqdîm nêkeno. Vera na tengayî ma xeylêk wexto vanê Rayîrê Hîrêyînî. Ma wazenê îradayê demokratîkî yê şaran vejê meydan. Ma vera tecrîdî azadîye, vera şerî haştîye, vera bêçareyîye çare, vera şîdetê serê cinîyan azadîya cinîyan, vera rijnayîşê xoza ekolojî pawenê. Ma hetê karker û kedkaran de yê. Seba ke medya kontrolê îqtîdarî de ya beno ke xebatê meesê la ma paştîya xo danê şarî û sîyasetê demokratîkî rayra benê. Ma halê bêhêvî yê wird blokan vînenê. Ma sere de şarê kurdî hêvî danê heme şaranê Tirkîya.''

Erbaşî ard ziwan ke ê do kongre de di mesajan bidê û vat: 'Mesajê ma yo verên; ma vera heme zextan û hêrişan sereberz payra yê. Şima se kenê bikerê, ma waştişanê xo canêverdenê. Ma tîya de yê, qerardarîye û têkoşînê ma dewam keno. Mesajê ma yo bîn; ma xover danê la eynî wextî de ma do bibê îradeyo ronayox. Vera polîtîkayanê bêçareyîye yê nê wird blokan ma do çareya demokratîke ya raşte vejê meydan. Şima zanê verê ma de vîjnayîş est o. Ma do nê atmosferî de bibê hêzê çare. Ma do pozîsyonê xo yê kritîkî hetê ameyoxê hempar û demokratîkî yê şaran de bişuxunenê.''

Erbaşî vat: ''Ma prosesê amadekarîya kongre de kongreyê herême kerdî û têhetameyîşê şarî kerdî. Şar hinda polîtîkayanê îqtîdarê faşîstî ra aciz bîyo.  Her kes vîneno ke îqtîdar çare nêaferneno.  Bi mîlyonan kesan hinda ameyoxî ra hêvîya xo birnaya.  Mîyanê nê tabloyî de şar alternatîfo raşt wazeno ke bedilnayîşo radîkal bibo. Şar têna bedilnayîşê îqtîdarî nêwazeno, wazeno ke wa sîtem bibedilîyo. Coka têkoşînê partîya ma û hêzanê demokrasîyî şaran rê beno hêvî. Ma do konge de bi şayîya raşte ya demokrasîyî vejîyê verê şarî û bimojnê ke HDP ameyoxê Tirkîya yo û heta ke meselaya kurdî çareser nêbo ameyoxê Tirkîya çîn o.''