Serekê Komeleya Kulturî ya Pîr Sultan Abdalî Cuma Erçeyî ANFyî rê qisey kerd û nê weçînayîşan ra waştişê elewîyan pare kerdî.

Erçeyî îfade kerd ke partîyî teyna seba rayan xo nêzdîyê elewîyan kenê û meseleyanê elewîyan çareser nêkenê. Erçeyî vat: ''Wa çew rayê elewîyan seba xo sey garantî nêvînê. Wa yar û neyar bizanê ke elewîyî teyna bi ferasetê 'Wa Erdogano şoro' nêewnenê weçînayîşan ra. Êyê ke raya ma wazenê ganî bi zelalî vajê 'Ma do nê welatî de seba elewîyan bingeyê hemwelatîya têdûşte awan bikerê û ney Qanûnê Bingeyî de garantî bikerê.'

Ma prosesê weçînayîşî de bi qiseyê 'nê weçînayîşî weçînayîşê krîtîk ê' dest pêkenê. La nê welatî de hişmendîya tekperestîye bi AKPyî dest pênêkerda. Tirkîya de na hişmendîye, serdestîya camêrdan, sentezê tirk-îslamî rew ra est ê. La 21 serranê peyênan de AKPyî dîktatorîyêke zî mîyanê nînan kerde. Şarê Tirkîya ganî bi rayanê xo lapatêkê xurtî bidê na dîktatorîye ro.''

Erçeyî bale ante ser ke 5 waştişê elewîyan ê bingeyî est ê û vat: ''Partîyê ke bernameyê xo de canêdanê nînan wa rayanê ma nêwazê.  Nê waştişê ma wina yê:

-Wa Serekîya Karanê Dîyanetî bêra wedaritene. Dîyanet ewro Tirkîya de bîyo merkezê fetwa, aqil û zanistî ra dûrî kewto.

-Dersê dînî wa wedarîyê. Îslam vera elewîyan sey hacetê asîmîlasyonî şuxilîyeno.

-Sere de Dergahê Haci Bektaşî Velîyî îbadetxane û dergehê ma yê ke dest nîyabî ser wa apey bêrê dayene.

-Cemxaneyê ma sey îbadetxaneyî wa qebul bibê û no Qanûnê Bingeyî de bigêro binê garantî. Wa Serekîya Dayîreyê Cemxaneyan a ke AKPyî binê sîwana Wezîrîya Kulturî de awan kerda, wa bêra qefilnayene.

-Wa Qirkerdişê Madimakî sey sûcê vera merdimatîye bêro qebulkerdene, sûcdarî bêrê muhakemekerdene. Otêla Madimakî wa biba muzeyê şermî.''