Salîh Ozbeko ke serranê 1990an de serekîya 'Taburê Şimşekan' kerda 2014 de bi birayê xo yê muxtarî dest nabi mal û mulkanê dewa Konalga. Dewijan o çax qeymeqamîye rê îtîraz kerdbî la îtîrazê înan ameybî redkerdene.

Ozbekî nika zî çim verdayo wareyanê Alandeştî. Seba ke tapuyê dewijan çin ê serqoricî Ozbekî dest na mal û mulkanê dewijan ser. Dewijan reyna îtîrazê qeymeqamîya qezaya Şaxî kerd la Şexî bi bahaneya 'Ma nê erdî bikerê malê xazîna' îtîrazî red kerdî.

Dewijê ke vera Ozbekî vejîyenê pê 'paştdayîşê bi rêxistine' yenê sûcdarkerdene. Goreyê agahîyanê ke dewijan dayê qereqolî venga dewijan dayo ke îfade bidê. Dewijan çend rojî verî Qeymeqamê Şaxî Ercan Sakaryayî de pêvînayîş kerd û waşt ke heqê şuxilnayîşê wareyan wa bêro dayene înan. La qeymeqamî wina cewab da dewijan: ''No ca erdê xezîna yo. Xora nêzdî de ma uca bikerê cayê umûmîye.''

Dewijan derheqê babete de ajansê ma rê qisey kerd û vat ke erdê înan yeno xespkerdene. Dewijan pare kerd ke ê do heta peynî têkoşîn bikerê û wareyanê xo nêdê qoricîyan.