6ê sibate 2013î de Mereş de 2 rey têdima erdlerzî virazîyaybî û tesîrê xo 10 bajaran bîybî. Ê bajaran ra yew zî Amed bî. Amed de 7 awanîyî rijîyayî û çi heyf ke 400 kesan ra zafêr însanan dinyaya bedilnaye. Komelaya MEDDERî zî Amed de ya û xebatanê ziwan kulturê kurdkî kena. Roja erdlerzî de berê xo şarê xo rê akerdî, bi desan kesan rê bîye setargehêke.

Hemsereka MEDDERî Şukrane Yakut û Mamosteyê Kurdkî û Endamê MEDDERî Mehmet Olmezî da zanayene ke, 21ê Sibate Roja Ziwanê Dayîke ya Cîhanî de xebatê kultur û ziwanê kurdkî êdî do sey verê dewam bikerê.

Şukrane Yakute, mexdûranê erdlerzî rê şîfa û serweşîye waşt û Roja Ziwanê Dayîke ya Cihanî, kurdan rê pîroz kerde û dîyar kerd ke ewro ra tepîya xebatê înan dewam bikerê û vera talûkeyê vindîbîyayîşê ziwanî bi heme hêzê xo têkoşîn bikerê.

Mehmet Olmezî ard ziwan ke Amed de cuye hêdî-hêdî normal bena û vat, ‘‘Gere xebatê ziwanî bêmabên her roje dewam bikerê, çi heyf ke rîyê nê erdlerzî ra hem ma zirarêko gird dî hem zî ma xebatanê ziwanî ra dûrî kewtî. Roja Ziwanê Dayîke de ma wazenê eşkera bikerê ke perwerdeyê ma yê sinifan do sey verê dewam bikerê û qeydê neweyî zî do reyna bêrê girewtene.

Mamoste Mehmet Olmezî ard vîrardene ke, verê erdlerzî hem onlîne hem zî rî bi rî perwerdeyê ziwanî ameyêne dayene û vat, ‘‘Asta destpêke, asta yewine, û asta diyine de hem onlîne hem zî rî bi rî sinifê ma estê. Xeylê kursîyerê ma û xeylê mamosteyê ma beşdarê xebatan benê. Tena perwerdeyê qiseykerdişî ney, yê wendişî û yê açarnayîşî zî yenê dayene. Ma nê erdlerzî ra dima no hewte, nê xebatanê xo pêro reyna danê destpêkerdene. Ziwananê kurdkî mîyan ra tewr zaf lehçeya ma kirmanckî telûke de ya. Bi serran o ke mamosteyê ma vera ney xebitîyayî û nika ra dima zî ma do xebata xo xurtêr bikerê û rayîrê mamosteyanê xo ra dewam bikerê’’