Erdogan pêvînayîş wazeno Kremlîn red keno

Alozîya mabênê Rûsya û dewleta tirke hem serê erdî de hem zî ware dîplomasî de dewam kena. Erdoganî pare kerdbi ke ê beno ke 5ê adare de Putînî reyde pêvînayîş bikerê la Kremlînî eşkera kerd ke rojdemo winasên çin o.

Alozîya mabênê Rûsya û dewleta tirke Îdlîb de  hem serê erdî de hem zî warê dîplomasî de dewam kena. Erdoganî pare kerdbi ke ê beno ke 5ê adare de Putînî reyde pêvînayîş bikerê la Kremlînî eşkera kerd ke rojdemo winasên çin o.

Ameyêne plankerdene ke bi tewrbîyayîşê Seekkomarê Fransa Macron, Serekkomara Almanya Merkele 5ê adare de Rûsya, Almanya, Fransa û Tirkîya do kombîyayîşêk bikerê.

Erdogan zîyaretê xo yê Azarbeycanî ra verî vat: ''Ma beno ke 5ê adare de bêrê pêser.'' Vervatoxê Kremlînî Dimitri Peskovî eşkerayîya xo de da zanayene ke rojdemê înan de kombîyayîşo winasên çin o la seba kombîyayîşê mabênê Îran, Rûsya, Tirkîya pêvînayîş yeno kerdene.

Alozîya mabênê Rûsya û Tirkîya bena pîle. Hêzanê rejîmê Sûrîye dima ke otobanê Şam-Halebî (M5) kontrol kerd verê xo da otobanê Haleb-Lazkîye (M4) û tîya de des wareyî cergan ra apey girewtî.

Hetê bînî ra dewleta tirke û cerganê ci zî vizêr şan bajarekê Neyrabî yê Îdlîbî girewt binê kontrolê xo.

Erdoganî ewro zî derheqê Îdlîbî de wina vat: ''Ma mecburê nê têkoşînî nîyê, ma mehkumê ci yê.''

Erdoganî hewteyanê peyênan de zî Ukrayna zîyaret kerd û bi vatişê  "Slava Ukreine" selam kerd protokol ke no selam sloganêko vera Rûsya yo. Bi nê hawayî Erdogan vera Rûsya meseleya Kirimî ardbi rojdem.

Heman hewteyî Erdoganî zîyaretê xo yê Pakîstanî de zî meseleya Keşmîrî ardbi rojdem ke Rûsya na mesele de paştî dana Hîndîstan.

Yeno pawitene ke Erdogan zîyaretê xo yê Azerbeycanî de zî meseleya Karabagî bîyaro rojdem. Karabag herêma mabênê Ermenîstan û Azerbeycanî de ya û bi serran o ke meseleya Karabagî çare nêbîye. Rûsya zî na mesele de paştî dana Ermenîstan.