Hukmatê yunanî verê kombîyayîşê NATOyî Kampa Lavrioyî ke bi serran o hedefê Tirkîya de ya, qefilnaye. Kampa ke bi paştdayîşî payra ya, hetê bi seyan polîsan ra ameyî sereştene.

Kampa Lavrioyî ya ke 1947 binê nameyê Kampa Macîran de ameye akerdene badê 12ê êlula 1980yî bîye mekanê surgunkerdeyanê kurdîstanijan û tirkîyayijan.

Kampa Multecîyan a Lavrioyî 5ê temuza 2023yî de raştê operasyonê leşkerî  ameye ke bi seyan polîsî tewrê ci bîyî.  Kampa ke zafêr kurdî tede manenê, polîsan pencra û berê ci şikitî, kewtî zere û doman û cinî zî tede 50î ra zafêr multecîyê kurdî bizor kampe ra vetî û seba ke berê kampanê bînan ê destbend kerdî.

Multecîyê ke ameyî destbendkerdene zafê înan ameyî berdene Kampa İnofiton (Oinofyta) ke 60 kîlometre Atina ra dûrî de ya û farîkayêka kahan a. 2021 de multecîyê rojawanijî tîya de ameyî hepskerdene û ma rewşa înan a xirabe kerbî rojdem.Kampa ke kiştê otobanî de ya cayê roniştişî û wesayîtanê komresî ra dûr a. Hukmatê yunanî keno ke multecîyanê kurdan komelî ra îzole bikero.

Nê multecîyan ra Leylaya ke pîya bi hîrê domanan û mêrdeyê xo zextanê dewleta tirke ra remaya û na kampe de ca dayo xo, vera nê operasyonî hêrsê xo ard ziwan û nê vatî: “No operasyonê tehlîye nêbi, operasyono leşkerî bi. Ma xo Kampa Lavrio de sey multecîyan hîs nêkerdene.Kampêka kurdan bî. Ma sey keyeyê xo wayîrê ci vejîyayêne. Şefeqê sibayî de 200-300 polîsan eşt kampe ser. Des hebî pîya bi çekanê giranan kewtî çimeyê ma. Domanê mi gerek nê travmayî senî xo dima verdî. Destê embaz û hemrayanê mi peykî kelemçe kerdî. Semedê 30-40 tenan bi seyan polîsî ameyî.”

Multecîyan ra Welatî zî wina vat: “Verî operasyonî bajar gerîya binê kontrolî. Makamê yunanê vanê kampe bi waştişê multecîyan ameye vengkerdene. No raşt nîyo. Hukmatê yunanî goreyê waştişê dewleta tirke têgêra.

Merkezê Kurlturê Kurdan ê Demokratîkan ê Yunanistanî  zî ard ziwan ke kampe bizor ameye vengkerdene û merkezê Atina de çalakîya protestoyî kerd. Protesto de ame vîrvistene ke 11-12ê temuze de tîtikê NATOyî est o ke no operasyon netîceya bazarîya bi dewleta tirke û NATOyî ame kerdene.

Înîsîyatîfê Paştdayîşê Multecîyanê Kurdan ê Sîyasîyan ê Lavrioyî zî eşkerayîya xo de nê vatî: “Hukmatê yunanî 2017î ra nata wezeno kampe veng bikero. Bi serran o Xaçê Sûrî  xo kampa ra peyser ant, hetkarîya dewlete ame vindarnayene. Rixmê heme zextan kampe 6 serrî yo bi paştdayîşî payra ya. Hukmatê neweyî waştişê Erdoganî ard ca û kampa ke Tirkîya bi serran o sey 'halînê terorîstanê PKKyî' name kena, qefilnaye. Hemşaredarê Lavrioyî zî bi serran o seba ke multecîyanê kurdan bifetino çîyo ke destê ci ra yeno keno.”