Komployê Mîyanneteweyî yê vera Rayberê Şarê Kurdî Abdullah Ocalanî 25 serrî xo dima verdayî. 25 serrî yo Abdullah Ocalan Îmrai de binê tecrîdê giranî de yo. Bi tecrîdê giranî yeno waştene ke Ocalan şarî ra bêro raqilnayene. Şexsê Abdullah Ocalanî de şaranê Rojhelatê Mîyanênî rê zî tecrîd yeno kerdene. Vera nê tecrîdî bajaranê Kurdîstanî de do serkêşîya KCD, DBP û DEM Partî û xeylêk rêxistinanaê komelê sîvîlî de Rayraşîyayîşê Azadîye yo Pîl bêro kerdene.  Rayraşîyayîşo ke do 1ê sibate bêro destbendkerdene do heta 15ê sibate dewam bikero.

Parlamenterê DEM Partî yê Amedî Serhat Erenî ke komployê mîyanneteweyî û tecrîd ANFyî rê erjnayî semedê tewrbîyayîşê Rayraşîyayîşê Azadîye yê Pîlî yo ke do mabênê 1-15ê sibate bêro destpêkerdene, veng da.

Qiseykerdişê Serhat Erenî bi kilmî wina yo: ''Dewleta tirke wextê ronayîşê xo ra tim kena ke kurdan asîmîle bikero û bi qirkerdişê kulturkî bi temamî tesfîye bikero. Semedê nê polîtîkaya sîstematîke yena domnayene. Kurdî tim yenê tecrîdkerdene, heqê înan yenê binpaykerdene û raştê qirkerdişan yenê. Kurdî tim  vera nê hêrişan xover danê. Xoverdayîşan serewedaritişê Şêx Seîdan ra heta Dêrsim, Zîlane, Agirî û Koçgirî dewam kerd. Serranê 90yan de kurdî wela xo ra newera ameyî dinya. Kurdan modelê newera afirnayîşê hêvî û pîya ciwîyayîşê şaran afirna ke bêşik mîmarê nê Birêz Abdullah Ocalan o.

Hêzanê hegomanîkan semedê menfeatê xo waşt kurdan bi temamî tesfîye bikerê. Coka komployê mîyannetweyî ame kerdene. Bi komployî ame waştene ke wa verê têkoşînê kurdan bêro girewtene. Birêz Ocalanî rixmê tecrîdê giranî fîkrê xo yê erjîyayî resnayî şaranê Rojhelatê Mîyanênî. Bi tecrîdê Îmraliyî huqûqê zereyî û mîyanneteweyî yeno binpaykerdene la welatê Ewropa semedê menfetê xo bêveng ê. Birêz Ocalan vano eke firset bêro dayene o eşkeno verê nê şerî bigêro. Têna Ocalan eşkeno bibo hêvîya şaran û prosesê newî bido destpêkerdene û şerî biqedîno. Wextê muzekeran de eşkera ame vînayene ke kam şer û kam haştîye wazeno.  Êyê ke şer wazenê cewab nêdanê vengdayîşê Birêz Ocalanî. Ma pêrun dî ke şer çare nîyo. Heta ke tecrîd mero wedaritene Tirkîya nêeşkena tengayî ra vejîyo. Ma vanê hinda bes o. Wa tecrîd bêro wedaritene, Birêz Ocalan bibo azad û prosesê dîyalogî newera bêro destpêkerdene.

Heme zîndanan de semedê azadîya Birêz Ocalanî û çareserkerdişê meseleya kurdan grevê vêşanîye est o. Eynî wextî de teber de zî dayîkanê ma Nobeta Edaletî tepişenê. Ya na mesele yana çaresekerdene ya zî ya zî komara ke bi serrî yo na mesele çareser nêkeno bi xo cum bena. Seranserê dinya de semedê azadîya Birêz Ocalanî xebatî yenê kerdene. Ez veng dana ke wa her kes tewrê Rayraşîyayîşê Azadîye yê Pîlî bibo ke do mabênê 1-15ê sibate de bêro kerdene. Heta azadîya Birêz Ocalanî û çareserkerdişê meseleya kurdan do têkoşînê ma dewam bikero.''