Serekê Baroyê Amedî Nîhat Erenî polîtîkaya tecrîdî ya ke Îmrali de vera Rayberê Şarê Kurdî Abdullah Ocalanî yena caardene û problemê ke netîceya na polîtîka de vejîyayî ercnayî.

Erenî vist vîrî ke xeylêk wext o avûkatê Abdullah Ocalanî nêeşkenê ey bivînî  û vat: ''No caardişêko bêhuqûq o. Avûkatê ke nêeşkenê pêvînayîş bikerê muracatê Baroyê Amedî kerd. Ma zî sey baroyî muracatê Wezîrîya Edaletî kerd ke pêvînayîş bikerê. Hema cewabê muracatê ma nêdîyayo. Ma muracatê xo de vat heqê avûkat û merdimanê tepişteyan est o ke pêvînayîş bikerê û waşt ke pêvînayîş bêro kerdene. Reyna avûkatan mengêke verî semedê şîyayîşê Îmraliyî yew kampanya daye destpêkerdene. Ma zî paştî daye na kampanya. Eynî wextî de ma pê belgeyanê selahîyetî semedê pêvînayîşî muracat kerd la çi heyf ke o waştişê ma zî nêame cewabkerdene.

 Ma zanê ke bi pêvînayîşê Îmraliyî no proseso wişt eşkeno bibo nerm. Rêxistinê huqûqî tersê îqtîdarî ra nêeftanî vera neheqîye vengê xo vejê. Coka huqûq, azadîye û demokrasîyî ra kewtî dûrî. Îqtîdar wazeno ke dezgehê huqûqî goreyê înan têbigêrê.  Rêxisitene, komele û waqfê huqûqî ke ameyî qefilnayene est ê. La rixmê heme zextan hema dezgehê huqûqî est ê ke têkoşînê xo domnenê. Ganî dezgehî rixmê heme zext û tehdîtan berpirsîyarîya xo bîyarê ca. Coka Baroyê Amedî û xeylêk dezgehê komelê sîvîlî yê bajarî çirey bêveng nêmanenê. Ma bedelê naye zî danê. Şima zanê serekê nê baroyî ame qetilkerdene. Na mana de ma zanê ke ma qey têkoşîn kenê. Semedê pawitişê nê komelî, huquq û heqanê merdiman ma do têkoşînê xo bidomnê.''