Eskerê Tirkî Dêrsim de payna cenaze û fotograf ant!

Eskerê Tirkî kovîyêka bîne vera merdimîye kerde. Dêrsim de payna cenazeyanê gerîlayanê ke şehîd bîyî û bi nê hawayî fotografî antî.

Goreyê xebera Ajansê Mezopotamyayî (MA), Dêrsim de nêzdîyê hewteyo operasyone artêşa Tirkî dewam keno û tayê cayan de mabênê gerîlayanê HPG’yî û esker-polîsanê Tirkî de şer qewemîyeno. Fotografê ke yenê îdîakerdene yê gerîlayan ê ke şer de şehîd kewtê medyaya sosyale de ameyî parekerdene.Tayê fotografan de ame dîyayene ke, sey serranê 1990’î eskerî paynanê  cenazeyan  û bi nê hawayî fotografan ancenê. Sereka MHP’yî ya Eskîşehîrî Sîbel Şengule zî serê hesabê xo yê Twîtterî ra bi vatişêko ke cayê xo merdimîye de çin o nuşt “Leşê Tûncelî, TSK hukm vila keno” û fotografî pare kerdî.

Kerbela de zî eynî çîyî ameyî kerdene

Serekê Komeleya Elewîyan a Demokratîke (DAD) Pîr Nesîmî Gemlîkî MA rê qisey kerd û vat, “Eke tarîxê merdimîye de serebutê Kerbela qewimîyo û heta ewro nêameyo vîrîkerdene, rîyê nê nimûneyan ra yo. Sereyê Hz. Huseyînî kerd cira û sifreyî ser o rona, cinî kerdî rût û bi nê hawayî deveyan ra kerdî aspar û teşhîr kerdî. Nika zî paynanê cenazeyan  û teşhîr kenê. No ferasetêkê ê demî yo. No feraset timî xo dubare keno. Wextê Osmanîyan de zî eynî nimûneyî estê.”

O îşkence bi keyeyan û cimatî yeno kerdene

Gemlîkî vat, “Her çî ra ver hukm serê merdeyî de nêmaneno. Nêbeno ke ti ceza bide merdeyan.  Bi kerdişanê winayan ê merdeyan wazenê ceza bidayê cimatî. O îşkence bi cimatî û keyeyê kesê merdeyî yeno kerdene. Kerdişê bi nê hawayî şermê merdimîye yê. Bawerîya Elewîyîye de merdimê winayî waraginaye yenê dîyayene û yenê şermezarkerdene. Mîyanê cimatî ra yenê teberkerdene. E yê ke pesna ci danê zî ma înan şermezar kenê.”