Fermandara  Qerargehê Merkezî ya YJA Starî Berîtane Dersim beşdara bernameyêkê Stêrk TVyî bîye û da zanayene ke hêzê hegemonîkî xo seba şer û kaosê xo Erdogan Rojhelatê Mîyanênî de şuxilnenê.

Qiseykerdişê Fermandare Berîtane Dersim ra beşêk wina yo:

''Rojhelatê Mîyanênî de şer û kaosê hêzan ê hegemonîkan dewam kenê. Sebebê pêro meseleyan sîstemo kapîtalîstê modernîte yo. Dermanê nê meseleyan zî paradîgamaya Rayber Apoyî ya. Modernîteya demokratîk û neteweya demokratîk a. Serekê ma vera kapîtalîzm na paradîgmaya xo pêşkêş kerde. Coka zîndanê Îmraliyî de yo. Hêzê hegemonîkî Rayber Apo xo rê sey gef vînenê.

Sey Têgêrayîşê Azadîye yê Kurdîstanî ma vera sîstemê kapîtalîzmî de yê. Paradîgma û sîstemê Rayber Apoyî seba kurdan û pêro merdimîye alternatîf ê. Senî ke hêzê hegemonîkî wazenê sîstemê xo dewam bikerê tay hêzê herêmîyî zî bi nê hawayî têgêrenê. Înan ra yew zî faşîst Erdogan û hemkarê ci MHP yo.

Erdogan faşîst û serekê cergan o. Erdogan terorê îslamî rêxistin keno pêro dinya rê gef waneno. Erdogan wazeno sîstemê DAÎŞî Tirkîya de rono. Gonî û genanê Erdoganî de û terefgîranê ey de faşîzm esto, îşxalkerî esta. Erdogan şino ça demografîya ci vurneno.

PKK, Serek Apo şansê peyênî yê bindestan ê. Eke bindest û kurdî wayîrê Rayber Apoyî nêvejîyê no şans do çin bibo û azadîye do qet nêra caardene.

Erdogan wextê xo yê tewr qelsî de yo. Çareserîya meseleyanê Tirkîya weçînayîş nê yewîya şaran a. Ganî pêro Tirkîya vera Erdoganî pîya têkoşîn bikera. HDP zî seba ke rayberîya vurnayîşî keno beno hedefê îqtîdarî. Erdogan bi hawayêkê eşkerayî naye vano û paweno.

Erdogan Lîbya ra heta Armenîstan, Viyana û Berlin vera pêro dinya gef o. Erdoganî cergê DAÎŞ û El Nûsrayî vera kurdan şuxilnayî û nika zî nê cergî erşawitî Karabagî. Ewropa zanena ke DAÎŞ Ewropa de rêxistinkerde yo. Erdogan bi xo DAÎŞ fînanse keno, wayîrê ci vejîyeno.  Eke welatê Ewropa ewro verê Erdoganî nêgêrê siba do erey bibo. Pêro camîyê Ewropa hetê Erdoganî ra ameyî rêxistinkerdene.  Erdogan têna meseleya kurdan nîyo.

Erdogan û sîstemê kapîtalîzmî PKKyî ra acîz ê û yewîya kurd û ereban ra acîz o. Hemleya KCKyî hemleyêka tarîxî ya. Ganî her kes wayîrê na hemle vejîyê. Rayberîye şansê ma yo peyên o, ganî ma nê şansî bipawê.  Ganî her ca bibê cayê têkoşînî.

Wext wextê azadîye yo. Azadîye zî pê têkoşînî visîyena destî. Ma vera hêrişanê dişmenî tewirêkê qelsî nêmojnê. Eqsê ci herinda ke ma her roje bikişîyê ganî têkoşîn bikerê, bedelan bidê û na qayde azad biciwîyê.''