Vera tecrîdo ke dewleta tirkî serê Rayberê Şarê Kurdî Abdullah Ocalanî de  dana domnayene û qedexeyê PKKyî Ewropa de çalakîyî vila benî. Vizêr reyna xeylê welatan de Kurdistanijî û dostê înan meydanan de bî.

Paytextê Awusturya Vîyana de qerarê qedexeyê PKKyî yê welatanê Yewîya Ewropa ame protestokerdene.

Çalakîye de ame vatane ke qerarê qedexeyê PKKyî vera heme kurdan o û çîyo winayên nîno qebûlkerdene.

Bajarê Montpellîerî yê Fransa de zî bi seyan kesan tecrîdê serê Ocalanî û qerarê Amerîka yê vera PKKyî şermezar kerdî.

Çalakwanan bi pankartan waştişê azadîya Ocalanî ard ziwan û bi fotogranê îdarekaranê PKK û KCKyî ra Cemîl Bayik, Murat Karayilan û Dûran Kalkanî bale ante qerarê Amerîka ser.

Bajarê Den Haagî yê Hollanda de zî bi heman waştişî rayraşîyayîşêk ame viraştene.

Çalakwanan bi kiriştişê posteranê Ocalanî rayraşîyayîşêk viraşt û azadîya Ocalanî û wedartişê qedexeyê serê PKKyî waştî.

Heto bîn ra seba paştîdayîşê çalakîya Leyla Guvene grevê vêşanîye ya biagêrayîş û bêdemî ame destpêkerdene.

Bajarê Freîburgî yê Almanya de zî ciwanan ê kurdan pirdêk de beyreqa PKKyî û posterê Ocalanî daliqnayî.

Bajarê Borlange yê Swedî de zî rayberîya Têgêrayîşê Ciwanên Şorişgêrî de bi rayraşîyayîşêk tecrîd û qedexeyê PKKyî ameyî pretestokerdene.

Çalakîye de derheqê PKKyî de xeylê vilawekî zî ameyî vilakerdene û slogana ‘‘PKK şar o şar tîya de yo‘‘ ameye eştene.

Bajarê Mîlano yê Îtalya de zî hemverê polîtîkaya maciran de çalakîyêka xurte ameye viraştene. Kurdan zî na çalakîye de cayê xo girewt û vera tecrîd û qerarê Amerîka hêrsê xo ard ziwan.

Bajarê Melbourne yê Awusturalya de zî bi wesîleya serragêrayîşê ronayîşê 40. yê PKKyî aktîvîteyêk ameye viraştene.