Xeylî bajaranê Fransa, Swîsre, Îtalya û Almanya de tecrîdê serê Rayberê Şarê Kurdî Abdullah Ocalanî û qerarê Amerîka yo ke derheqê ronayox û rayberanê PKKyî de girewtibi ameyî protestokerdene.

REIMS

Bajarê Reimsî yê Fransa de bi çalakîyêk tecrîdê serê Ocalanî ame protestokerdene. Sîyasetmedar û temslîkarê sendîkayanê Fransa zî tewrê çalakîye bîyî.

Çalakwanan bi meşelayan rayîrraşîyayîşêk viratş û bi slogananê ‘‘Ocalan îradeyê ma yo‘‘ û ‘‘ Erdogano terorîst‘‘ azadîya Ocalanî waşte.

BASEL

Bajarê Baselî yê Swîsre de zî semedê protestokerdişê qerarê Amerîka yê vera rayberanê PKKyî kurdîstanijî û dostê ci kuçeyan de bî.

Anarşîst û antîkapîtalîstê Swîsre û rêxistinê çepî yê Tirkîya zî tewrê çalakîyî bîyî û qerarê Amerîka şermezer kerd.

ROMA

Paytextê Îtalya Roma de zî qerarê Amerîka ame protestokerdene. Qiseykerdişan de ame vatene ke qerarê Amerîka sey dewamê komploya mîyanneteweyîye yo û ê nê qebûl nêkenî. Çalakwanan da zanayene ke PKK têgêrayîşê merdimîye yo û ê wayîr ro ci vejîyenê.

HAMBURG

Bajarê Hamburgî yê Almanya de zî verê konsolosxaneyê Amerîka de çalakîyêk ameye viraştene. Çalakwanan posterêko gird yê Ocalanî akerd û bi slogananê ‘‘ Tirkîyaya terorîste, Amerîkaya hemkare‘‘ hêrsê xo ard ziwan. Qiseykerdişan de ame vatene ke PKK şarê kurdî temsîl kena û şar rayberanê xo rê wayîr vejîyeno.

STUTTGART

Bajarê Stuttgartî de zî semedê protestokerdişê tecrîdê Îmralî çalakîyêk ameye viraştene. Çalakwanan hêrişê dewlata tirkî rê hemkarîya Almanya zî şermezar kerde. Reyna qerarê Amerîka zî ame protestokerdene û mesajê berzkerdişê mucadeleyî ame dayene.

BERLÎN

Paytext Berlîn de zî qerarê Amerîka ame protestokerdene. Çalakwanan  Almanya de qedexekerdişê PKKyî sey şermêko gird hesibna û waşt ke wa no qedexe gamêk cuwa ver bêro wedartene.

Çalakîye de slogana ‘‘Ma heme Bayik, Kalkan û Karayilan ê‘‘ ameye eştene û muhîmîya paştdayîşê şaran û mucadeleyî ser o ame qiseykerdene.

Peynîya mîtîngî de polîsanê almanan sloganî sebeb ramotî û 7 kurdîstanijî girewtî binçimî.