Seranserê  Ewropa de semedê tecrîdê serê Ocalanî û hêrişê dewleta tirkî yê vera Rojawanî çalakî yenê viraştene. Vizêr Fransa û Swed de şarê kurdî reyna kuçeyan de bi.

Bajarê Marsîlya yê Fransa de kurdîstanijî û dostî yê bajarî û dormeyê ci ameyî têhet û bi çalakîyêk hêrişê serê Rojawanî û tecrîdê Îmralî protesto kerdî.

Bi seyan kesî bi alayanê  YPG-YPJ, PKK û posteranê Ocalanî bale ante polîtîkaya hêrişkare ya dewleta tirkî ser û bêvengîya welatanê Ewropa protesto kerde.

Çalakwanan bi slogananê ‘‘Bicuyo xoverdayîşê Kobanê‘‘, ‘‘Ocalanî rê azadîye, Kurdîstanî rê aşîtî‘‘ û ‘‘ Erdogano qetilkar, Macrono hemkar‘‘î rayîrraşîyayîşêk viraşt, hêrişkaran rê hêrsê xo ard ziwan û mesajê paştdayîşê Ocalanî û Rojawanî dayî.

Bado zî mîtîngêk ame viraştene. Qiseykerdişan de ame vatene ke  vera hêrişanê dewleta tirkî yê Rojawanî bêvengîya Erwropa hêrişkaran rê paştdayîş o.

Bajarê Malmo yê Swedî de zî hetê 16 rêxistinanê komelanê sivîlan ra bi wesîleya 1ê Teşrîna peyêne Roja Kobanê ya Dinya çalakîyêk ameye organîzekerdene.

Çalakîye ra ver xoverdayîşê Rojawanî ser o panelêk ame viraştene.  Qiseykerdişan de bale ancîya xoverdayîş û sîstemê Rojawanî ser.

Bado zî rayîrraşîyayîşêk ame viraştene û derheqê polîtîkaya hêrişkare ya dewleta tirkî de zanayîş ame dayene.

Bi nameyê Partîya Çepî Mats Kejonenî qala verênan yê kurdan ‘‘Bê koyan yewna dostê kurdan çîn o‘‘ vist vîrî û va:‘‘ YPG û YPJyî vera çeteyanê DAÎŞî mucadeleyêkê erjayeyî danî.  Ganî heme dinya wayîr ro înan bivejîyo la ewro vera hêrişanê dewleta tirkî yê Rojawanî kesî ra veng nêvejîyeno û no nîno qebûlkerdene.