14ê hezîrana 2018î de qezaya Pirsûsî ya Riha de pawitox û merdimanê Wekîlê AKPyî Îbrahîm Halîl Yildizî dikana keyeyê Şenyaşarî de hêrişê înan kerd. Hêriş de Celal, Adil, Mehmet, Fadil û Ferît Şenyaşar birîndar bîyî û wedarîyayî Nêweşxaneyê Pirsûsî. La merdimanê Yildizî reyna hêrişê keyeyî kerd. Hêriş de Celal û Adil Şenyaşar ameyî qetilkerdene û babî Haci Esvet Şenyaşar zî verê çimanê cinîya xo Emîne Şenyaşar de ame lînçkerdene û kiştene.

Reya verêne Haci Esvet û domanê ci Adil û Celal Şenyaşar yenê yadkerdene. Merasîmê yadkerdişî 'Kuçeyê Bîr Mîlyoncular' de ame kerdene. Ferît Şenyaşaro ke hêriş de birîndar bibi û dadîya ci Emîne Şenyaşar 463 rojî yo verê Edlîyeya Riha de Nobeta Edaletî rê dewam kenê. Emîne û Ferît Şenyaşar edlîye ra verî ameyî cayê qirkerdişî û qeranfîlî nayî ro. Esnafanê Pirsûsî zî  seba ke vera na bêedaletîye nêrazîbîyayîşê xo bimojnê dikanê xo anêkerdî.

Ferît Şenyaşarî verê dikana înan qisey kerd û vat: ''3 endamê a 14ê hezîrana 2018î de ameyî qirkerdene. Dima Nêweşxaneyê Pirsûsî de hêrişê ma ame kerdene. Rixmo ke serebûtî 4 serrî xo pey de verdayî la hema zî dewa  nêameye roşnîkerdene. Ma na dewa de qurban ê. Pêro şarê Pirsûsî nê serebîtî hol zaneno. Ewro goristan de yadkerdiş do bêro kerdene. Esnafanê Pirsûsî zî dikanê xo anêkerdî û tewirê xo mojna.''

Dima Goristanê Şaredarîye yê Pirsûsî de ameyî yadkerdene. Keyeyê Şenyaşarî, esnafê Pirsûsî, Hemserekê KCDyî Berdan Ozturk, Hemsereka DBPyî Salîha Aydenîz, Wekîla HDPyî ya Riha Ayşe Surucu, Mayê Haştîye, Platformê Kede û Demokrasî, Îdarekarê HDPyî zî tede xeylêk kesî tewrê merasîmî bîyî.

Polîsan verê goristanî de waşt ke girse asteng bikerê la girse û wekîlan ney rê nêrazîbîyayîşê xo mojna. Emîne Şenyaşar uca de îfade kerd ke heta ke girse zî nêro a do nêşora serê goran. 30 deqayan ra dima girse kewt goristanî. Girseyî goranê Haci Esvet û domanê ci Adil û Celal Şenyaşarî ser de dua kerdî, Emîne Şenyaşar lorîkî vatî.

Ferît Şenyaşarî serê goran de pare kerd ke ê pabeyê edaletî yê û vat: ''Sena ke Wekîlê AKPyî tede yo, kiştoxan rê çîyêk nêno kerdene. Şarê Pirsûsî sere de, bi mîlyonan kesî wayîrê dewaya ma vejîyenê. 4 serrî yo ma serweşîye nêkerde û heta edalet nêro caardene ma do nêkerê.''

Salîha Aydenîz dîyar kerd ke ê heta peynî hetê Keyeyê Şenyaşarî de yê û vat: ''Heta ke keyeyê Şenyaşarî rê edalet nêro caardene demokrasî nêbena. Her kes nê qirkerdişî hol zaneno. Ma do heta peynî bigêrê edaletî.''

Nameyê Platformê Kede û Demokrasî ser o Hemserekê Şubeyê Riha yê Sendîkaya Kedkaranê Weşîye û Komelkî (SES) Salîh Karataşî qisey kerd û îfade kerd ke ê do tim paştî bidê Nobeta Edaletî ya Keyeyê Şenyaşarî.

Girseyî dima ke qeranfîlî ronayî goristan ra şîyî.