Festîvala Fîlmanê Kurdan a Londonî (LKFF) ya 14ine mabênê 25ê nîsane û 3yê gulane de do bi şîarê ‘’Ancî Govende’’ bêra kerdene. Festîvale de bi temamî do 58 fîlmî bêrê mojnayene.

Festîvale do bi mojnayîşê fîlmê ‘’Rojeke Şad’’î yê Hisham Zamanî dest pêbikera.

Festîvale de do 10 fîlmê dergî, 13 dokumenterî, 20 fîlmê kilmî, 14 dokumenterê kilmî û 1 anîmasyon bêrê mojnayene. 

Dîrektorê festîvale Ferhan Stêrkî îfade kerd ke înan temaya emserîne sey ‘’ancî Govende’’ dîyar kerda û vat: ‘’Ganî hinî ma qalê dej û şerî ney qalê xoverdayîş, heskerdiş û hêvîye bikerê.’’

Stêrkî da zanayene ke festîvale de bi taybetî fîlmê cinîyan ê dîrektoran bale ancenê. Stêrkî vat: ‘’Bi rayîrê nê fîlman temaşewanî hîkayeyanê kurdan, rewşanê merdimatîye, hîsanê globalan û lazimîya paştdayîşî do hîs bikerê.’’

Festîvale de jurîya xelatan nê kesan ra yena pê: Ozgur Amed, Joanna Bochenska, Arsalan Amiri, Dimitris Kerkinos, Seray Genç û Zahavi Sanjavi.

Festîvale de xelatê Roja Zer, Mehmet Aksoy, Yilmaz Guney û Tahir Kerîmî do bêrê dayene.